ORANJESTAD (AAN); Durante luna di Juli 2019, Aruba a haya como 1.3% mas turista di barconan turistico. Esaki segun statistica suministra door di Aruba Ports Authority.
Den cifra, esaki ta igual na 46.952 bishitante, ta 1.3% mas compara cu e mesun periodo di 2018, cu tabata 46.370 pasahero.
Na Juli 2018, Aruba a haya 15 barco crusero. E aña aki, esaki a subi na 16 barco.
Si check luna di Juni, esaki tabata 9 barco aña pasa, y e aña aki tambe e ta 9 barco. Na luna di Juni, solamente 12 pasahero mas a drenta compara cu e aña anterior.
E portal di Aruba Ports ta mustra cu den e prome seis luna (Januari te Juni), Aruba a haya un total di 167 barco pa 2019, y a trece un total di 435.112 pasahero. Esaki ta menos compara cu 2018. Aña pasa e isla a haya mas barco, esta 182 crusero, y a trece en total 437.245 pasahero.
