Home Gobierno Aruba su aceptacion na varios organizacion internacional ta hopi positivo y grandi

Aruba su aceptacion na varios organizacion internacional ta hopi positivo y grandi

81
0
SHARE
- Advertisement -

Minister Plenipotenciario pa Aruba na Washington

ORANJESTAD (AAN): Minister Plenipotenciario pa Aruba na Washington, esta Joselin Croes durante su bishita cortico na Aruba entre otro pa duna update na Conseho di Ministronan riba su trabaonan, a duna di conoce cu Aruba su aceptacion na varios organizacion internacional ta hopi positivo y grandi.

Esaki ta hopi importante pasobra, segun Minister Plenipotenciario Croes, esaki no semper tabata asina.

Pa añanan largo Aruba y Curaçao tabata worde mira como parti di Reino y pa e motibo aki Hulanda so tabata representa e islanan aki na tur e reunion y conferencianan. Aruba no tabata worde mira como un pais autonomo den Caribe. Sinembargo esaki a cambia den e uiltimo añanan y cada biaha mas Aruba ta hayando invitacionnan como pais autonomo pa casi tur organizacion internacional manera PAHO, IMF, WB, OAS entre otro.

Minister Plenipotenciario Croes ta representa Aruba na e organizacionnan aki y asina tin e oportunidad di gara e informacion direct y no via Hulanda. Aruba ta hayando hopi reconocemento internacional especialmente pa loke Aruba ta haciendo riba tarima di medio ambiente. E prohibicion di plastic ta un topico cu ta worde discuti hopi ya cu Aruba ta un di e tiki islanan cu a tuma esaki na serio y a implementa e ley.

E movimento di ‘waste to energy’ y e proteccion di nos lama na unda Aruba a bin cu un ‘Bio Marine Park’ ta topiconan hopi interesante y mirando cu Aruba ta bayendo den e direccion aki ta duna e oportunidad pa Aruba haya cobertura internacional. Diferente instancianan manera United Nations y/of IMF ta invita Aruba como orador pa nan conferencianan.

Aña pasa tambe, Minister Plenipotenciario Croes a duna di conoce, Aruba a bira miembro di GLISPA. Esaki ta un “Global Island Partnership” hunto cu tur e islanan den pacifico cu ta duna e oportunidad di siña tur loke e otro islanan ta haciendo den medio ambiente.

Luna pasa tambe Aruba tabata e host pa e prome ‘Island Professional Network Gathering’ cu ta un network di tur e profesionalnan bibando na Washington DC cu ta trahando riba e islanan. E topiconan a encera coralnan, blue economy, y e problemanan cu islanan ta enfrenta manera cantidad di turistanan y e construccionnan anadando cu ta afecta nos medio ambiente.

Tambe Aruba ta forma parti di US/Caribbean 2020 Partnership. Ta traha riba asuntonan cu ta importante pa Caribe manera: proteccion di frontera, disaster natural y su efectonan, economia di islanan chikito, e vulnarebilidad di islanan chikito, Venezuela, corupcion y integridad, problemanan di hubentud, Isis drentando Caribe, problema di hubentud y hopi mas.

Minister Plenipotenciario Joselin Croes a duna di conoce cu portanan ta habriendo mas y mas pa Aruba poniendo nos riba e plataforma internacional riba diferente tereno y ta crea mas oportunidad pa nos pais riba tur tema menciona.

 

- Advertisement -

DUNA COMENTARIO

Please enter your comment!
Please enter your name here