Home Turismo ATA a renova contrato pa Aruba Soul Beach Festival cu duracion di...

ATA a renova contrato pa Aruba Soul Beach Festival cu duracion di cuater aña

87
0
SHARE
- Advertisement -

Sra. Ronella Tjin Asjoe-Croes:

ORANJESTAD (AAN) – E director di Oficina di Turismo di Aruba, sra. Ronella Tjin Asjoe- Croes a declara den entrevista cu DIARIO, cu e negociacionnan pa e evento “Soul Beach Music Festival” a tuma lugar, y manera semper, e negociacionnan aki ta riguroso na momento cu ATA ta renova un contrato.

No ta diferente e aña aki, pero e ta dura hopi pasobra e no ta un decision facil pa tuma, y ambos partido ta negocia hopi duro.

Sra. Tjin Asjoe-Croes a informa cu nan a yega na un acuerdo y tin continuidad di Aruba Soul Music Festival cu metanan ahusta y contrario na añanan anterior, cu un duracion di cuater aña na lugar di tres.

Di e manera aki ta brinda mas estabilidad na e acuerdo cu tin entre ambos partido pero tambe garantizando cu aki dos aña lo no drenta den negociacion atrobe manera ora e contrato tabata tin un duracion di tres aña.

Esaki ta un proceso normal, principalmente cu eventonan grandi cu ta conoci na Aruba, manera Aruba Summer Music Festival, Aruba Soul Beach Music Festival y esun cu a inicia aña pasa cu ta mas chikito cu ta Aruba Island Take Over Festival.

Cu e evento aki, aworaki ATA ta finalizando diferente acuerdo, pa asina esaki por tin continuacion tambe na November venidero, Directora di ATA a duna di conoce.

E festival aki ta un tiki mara na e Beach Tennis Aruba cu tambe ta haya bon sosten di ATA, cu ta kere den dje y cu ta duna bon resultado, sra. Tjin Asjoe-Croes a indica.

Ademas tin e conferencia ATECH* cu ta un evento cu ta sirbi diferente proposito, pero ATA pensando riba innovacion ta kere cu e tin su merito pa continua y aunke e no ta un evento grandi pa ATA, e ta tuma lugar den e mesun periodo di November.

En todo caso, e directora di ATA a subraya cu ta cosnan cu continuamente nan ta organizando, deliberando, y unda nan ta sinti confortable y responsable nan ta drenta den acuerdonan di mas cu un aña di duracion.

Bolbiendo na Aruba Soul Beach Music Festival, directora di ATA a menciona cu nan ta haci un investigacion riguroso tur aña. ATA sa cual ta su balor agrega economicamente tur aña, y ki tipo di bishitante ta bin, pero tambe kico ta e aspectonan cu ta traha y cualnan no ta traha.

Pesey aworaki nan ta enfoca no solamente riba e concierto, pero riba e experiencia completo cu e dianan cu festival ta akinan, ta duna. Pues e evolucion di e evento riba e area unda e ta tuma lugar. Sra. Tjin Asjoe-Croes a señala cu concierto ta un actividad durante vacacion, y cu ta general cierto interes den e caso di Soul Beach, siguiendo diferente influencia cu tin na Merca.

ATA ta purba di trece mas opcion pa e publico por goza mas di e interes cu e bishitantenan tin. El a comenta cu no tur hende cu ta bin pa e concierto aki ta bay tur presentacion. E ta un fenomeno cu ATA ta ripara den e cifranan y e ta algo cu nan ta tene na cuenta. Claramente e comunidad local si ta enfoca den e concierto y esey semper tin un valor agrega pa nos mes comunidad, y ATA ta conciente di esey.

- Advertisement -

DUNA COMENTARIO

Please enter your comment!
Please enter your name here