Home General “AZV CU SU COBERTURA Y FINANCIACION ACTUAL NO TA SOSTENIBEL”

“AZV CU SU COBERTURA Y FINANCIACION ACTUAL NO TA SOSTENIBEL”

122
0
SHARE
- Advertisement -

Den entrevista interesante cu DIARIO, Ir. Edwin Jacobs ta elabora tocante su tesis:

ORANJESTAD (AAN) — Riba media social por a tuma nota cu sr. ir. Edwin Jacobs, director di SVb, siman pasa a defende cu exito su tesis di graduacion na Universidad di Buenos Aires.

Pa e motibo aki DIARIO a acerca sr. Jacobs pa haya sa mas di e estudio cu el a realiza.

Den un serie di articulo DIARIO lo presenta e entrevista cu a sostene cu sr. Jacobs.

Diario: sr. Jacobs, prome cu tur cos, pabien cu e logro. Por a informa den ki cuadro a realiza e estudio di su tesis?

Sr. Jacobs: “Masha masha danki pa e felicitacion. Ta asina cu SVb ta miembro di e organizacion continental di seguridad social “Interamerican Conference on Social Security” (CISS), cu sede na Ciudad di Mexico.

Den cuadro di capacitacion, CISS a yega na un acuerdo cu Universidad di Buenos Aires pa diseña un estudio na nivel di master riba e area di “Actuaria”. E estudio a haya e nomber Gestion actuarial pa Seguridad Social. E estudio aki, cu tabata uno na distancia, a keda ofrece na profesionalnan di e organizacionnan miembro di CISS. Pa SVb sigur e tabata un bon oportunidad pa avanza riba e tereno aki. Ademas di mi persona, colega sra. Celina Tromp, funcionario di maneho, a cualifica pa atende e estudio, cu a inicia na September 2012. Y siman pasa, a toca nos dos pa hiba e defensa publico di nos tesis di graduacion”.

Diario: Interesante pa mira con cooperacion entre institutonan ta traha na nivel internacional. Ki tema sr. Jacobs su tesis a aborda?

Sr. Jacobs: “E estudio ta uno actuarial, loke ta nifica cu e estudio ta dirigi riba desaroya e habilidad pa proyecta gastonan y entradanan di e diferente sistemanan di seguridad social, teniendo cuenta cu  desaroyo di e poblacion, economia y otro aspectonan importante. Den nos caso e sistemanan aki ta e seguronan cu SVb ta administra y e seguro di AZV. Mirando cu mi ta domina caba e seguronan di SVb, mi a bay pa e reto pa amplia mi conocemento cu e seguro di gastonan medico. Y mi a propone mi mes pa haci proyeccionnan actuarial di e gastonan y entradanan di e seguro di AZV durante e periodo 2015 pa 2035. Y den luz di esaki determina si AZV ta pagable, pues ta sostenible. Mas specifico, mi a propone mi mes pa calcula e impacto di e envehecimento di nos poblacion y di malesanan cronico riba e gastonan di AZV den e periodo menciona”.

Diario: E ta mustra di tabata un estudio amplio.

Sr. Jacobs: “Sin mas e tabata un estudio amplio y unico pa nos region. Y esaki por tabata posible pasobra di un banda nos tin un seguro central y di dos e datonan di AZV ta di un bon calidad y structura cu e ta permiti uza nan pa proyeccionnan actuarial.

Pa cu mi estudio, mi a ricibi un excelente cooperacion di Organo Ehecutivo AZV. Mi gradicimento na nan”.

Diario: Cual ta puntonan mas relevante di sr. Jacobs su estudio?

Sr. Jacobs: “E prome parti di e estudio tabata dirigi riba proyeccion di e gastonan. Pa cu esaki, a cuminza na realiza proyeccion di e poblacion asegura di AZV na 2015. A haci esaki basa riba 4 escenario, asumiendo migracion of no y asumiendo aumento den speranza di bida of no. Tur esaki pa saca afor e impacto di envehecimento riba e structura di edad di nos poblacion y impactonan economico”.

Diario: Y cual ta e desaroyo cu ta resalta den e parti demografico?

Sr. Jacobs: “Den e parti demografico ta resalta cu e poblacion di Aruba di 2015 ya tabata den un fase hopi avansa di envehecimento. Nos indicadornan di envehecimento ta halto. Di otro banda tambe ta resalta cu e poblacion di 2015 no tin e potencia pa reemplaza su mes den futuro. Concretamente esaki ta nifica, cu den e añanan nos dilanti ta yega e momento cu e cantidad di babynan cu lo nace ta menos cu e cantidad di personanan cu lo fayece. Esaki ta encera cu nos poblacion no lo crece den forma natural. E unico forma pa nos poblacion crece ta mediante migracion. Y asina nos ta yega na e di 3 punto cu ta resalta. Pa motibo di envehecimento, nos capacidad di produci ta bay bira menos. Esaki pa motibo cu lo tin mas hende ta bay cu pension cu lo tin persona ta drenta e edad pa traha. E unico forma pa mantene e capacidad di produccion ta mediante imigracion. Y si ta desea di aumenta produccion, mester importa mas persona. Y mi estudio ta mustra cu Aruba mester keda expande mas su economia pa por reduci e debe publico y paga nos seguridad social”. Te asina leu den e prome parti di Diario su entrevista cu sr. ir. Edwin Jacobs. DIARIO ta gradici ir. Jacobs, director di SVb pa a duna nos e entrevista asina interesante aki.

 

 

 

- Advertisement -

DUNA COMENTARIO

Please enter your comment!
Please enter your name here