Home Enseñanza Bao auspicio di Divi Resorts Scol Pius X a haya full aire...

Bao auspicio di Divi Resorts Scol Pius X a haya full aire acondiciona

21
0
SHARE
- Advertisement -

Cabesante Sheila Tromp a splica:

ORANJESTAD (AAN)—Scol Pius X a cuminza participa den e Conseho di Muchanan (Raad van Kinderen) y ta e prome scol cu a inicia e proyecto aki, via Fundacion Princess Laurentien.

Asina e cabesante di Scol Pius X, Sheila Tromp, a duna di conoce den entrevista cu DIARIO. El a splica cu e prome debate di e alumnonan a bay cu un compania y e di dos tabata cu Divi Tamarijn All Inclusive, cu a hiba e scol na e top 3 den Caribe y Hulanda. Pius X a gana e Brons Award di Kids Counsel y nan a bay Hulanda hunto cu Divi, pa ricibi nan premio.

“Como Conseho di Muchanan e compania ta adopta e scol pa un periodo di mas of menos tres aña, unda e alumnonan ta trece dilanti cierto ideanan relaciona cu problemanan cu e compania tin, y kizas scuchando for di e mente di un mucha e ta mas creativo”, sra. Sheila Tromp a señala.

E di dos aña atrobe a bolbe participa cu Divi y e scol a gana e Silver Award y semper nan a soña cu haci nan ambiente di scol mas agradable pa e muchanan, y esaki tabata pone airco.

Cabesante di scol sra. Tromp a menciona  cu door di nan propio forza no tabata posible, pasobra manera tur hende sa, coriente ta costa hopi placa. Scol a haya en principio OK for di gobierno pa Pius X haya airco, pero despues nan para esaki y kite for di e plan. Anto Divi mes a duna un stap dilanti, como un gesto di gratitud, pa exposicion mes cu e alumnonan a duna e hotelnan, y cu scol a sinta na mesa, y duna di conoce cu Divi kier haci Pius X full na airco.

Scol a cuminza traha y busca cotizacion, y un compania renombra na Aruba a duna nan un tremendo deal, un pakete completo pa e scol, y nan mester a haya un electricista pa haci e trabao ya cu e scol tabata tin instalacion bieu, y aworaki Pius X tin airco na henter e scol.

“Aworaki alumno y maestronan ta experenciando un clima hopi agradable na scol, vooral e dianan aki di hopi calor cu den un klas hopi cera ta hopi dificil pa e alumnonan concentra y pone atencion. Juffrouwnan ta mira un ambiente hopi mas agradable, e alumnonan ta hopi ma atento, maestranan ta traha mas dushi y e dia ta bay mas suave, y e rendimento di e muchanan tambe por subi y esaki ta necesario” sra. Sheila Tromp a comenta.

Sra. Tromp a comenta cu hopi biaha e scolnan tin cu bati porta di sector priva pa duna ayudo, si nan kier desaroya un proyecto pero e ta dificil. “Pero akinan nos tin un prueba di un comerciante cu a kere den nos muchanan, den nos futuro, den e scol y a contribui cu Pius X cu un suma grandi y nos ta gradici esey”, sra. Sheila Tromp a comenta.

El a haci un yamada na comercio pa sigui kere den e scolnan y inverti den nan pasobra muchanan ta Aruba su futuro.

Scol a introduci e airco geld, den cual e mayornan ta coopera hopi bon, y esaki for di prome cu scol a caba. Mayornan a kere den esaki y a cuminza contribui sin wak e airco. Riba e prome dia di scol nan tabata tey, y nan a wordo splica cu scol ta bezig cu ELMAR y cu tabata falta e ultimo toke pa airconan bay on. Mayornan ta dispuesto a coopera y nan ta wak e importancia di esaki pa nan yiu. Sra. Sheila Tromp a expresa palabranan di gradicimento pa e mayornan tambe.

 

 

- Advertisement -

DUNA COMENTARIO

Please enter your comment!
Please enter your name here