Editorial
E crisis actual di Aruba tin su origen directo den e mal maneho financiero y economico di gobierno anterior. E cadena di fayonan ta conoci pa Aruba cu awe ta paga e debe nacional cu interes y tur costo directo y indirecto di Citgo.
Nos no ta para keto na e origen directo awe, pero nos kier yega na e motibo pa cual e crisis por a wordo desaroya.
Na 1985 Aruba a drenta un fase nobo di su historia. E pais lo a sigura mantencion y promocion di su base economico segun reglanan cu lo a sirbi na prome luga e bienestar di e pais y su ciudadanonan.
Esaki tabata encera cu Aruba como pais autonomo mester a sigura cu tambe riba tereno economico e Arubano cu a lucha cu alma y curpa pa realisacion di su pais, a ocupa e luga central den e pais nobo cu a nace dia Prome di Januari 1986.
Pa Aruba por a acepta su Status Aparte dia Prome di Januari 1986, comercio a participa activamente den e diseño di economia di Aruba ora e delegacion di Aruba a enfrenta Reino.
Pa cumpli cu e necesidadnan di un pais feliz economia mester a tene cuenta cu e identidad propio di Aruba riba tur tereno.
Comercio local di Aruba a participa directamente den buskeda di solucionnan ora e crisis di Lago a presenta y na forma directo a sostene esfuersonan pa yuda e Arubianonan mas afecta pa e crisis cu a wordo crea dor di e salida di Lago.
Tabata empresanan local cu a sostene e trabounan di e prome gobierno di Aruba, pa trata na crea un futuro nobo pa Aruba basa riba turismo.
Segun e plan di e prome gobierno di Aruba, hotelnan nobo lo mester a stimula economia y duna resultado pa e pais. Pa e motibo aki Aruba a duna e proyectonan grandi garantia financiero cu Aruba mester a paga si nan a fracasa.
No a pone un limite ni un descripcion fiho na e entrada di mas compania grandi ni a crea paketenan cu mester a crea pa e companianan chikito. A sali for di e punto di bista cu e companianan chikito Arubano lo mester a beneficia for di loke e companianan grandi ta trece.
E placa cu tabata sostene garantianan, mescos cu awe a pasa cu e proyectonan PPS, tabata di Gobierno y tabata wordo genera grandemente dor di comercio di Aruba.
E empresanan Arubano mester a hinca nan placa pa engrandece Aruba como producto turistico pa yuda crea e economia nobo.
Despues di Status Aparte, e luga principal den comercio local, a wordo kita for di empresanan local.
Gobierno di e pais Aruba a cambia ley y a permiti pa gigante internacional bin bira competencia directo pa negoshinan local Arubano y ofrece tur producto cu Arubianonan tabata pone riba mercado.
Aki nos problema a cuminsa y a sigui desaroya cu bista riba gigante y negligencia di e empresanan local chikito, cu na 2014 a bolbe bini dilanti ora Aruba a cay den problema serio scondi.
Na luga di un plan pa reactiva empresa local mediano y chikito, a bay crea un proyecto di halto riesgo pa Aruba, cu te awe ta na cadena di e proyecto Citgo.
Nos ta bolbe bati alarma pa e alma economico di Aruba, cu ta e negoshinan chikito cu ta victima di politica di avestruz cu ta prefera uza placa di Aruba contra interes di e empresa local autentico di Aruba.
Pa sanea Aruba lo mester di un comercio fuerte, cu ta e fuente di entrada di trahado cu no por conta mas cu trabou den gobierno como solucion.
Den un situacion mundial di gran preocupacion, mester bini sosten pa e negoshinan Arubano cu ta mara directamente na e bienestar di Aruba.
