Home Parlamento “Bo ta e autor intelectual di e desaster di nos finanzas publico...

“Bo ta e autor intelectual di e desaster di nos finanzas publico y abo awe kier culpa nos Minister Presidente? Bin Bij!”

110
0
SHARE
- Advertisement -

Endy Croes sorprendi cu Mike de Meza kier culpa Premier

ORANJESTAD (AAN): Parlamentario Endy Croes ta splica cu ki ora un miembro di AVP primordialmente esnan culpabel pa e situacion real di pais Aruba kier manipula y bin cu engaño nos lo cumpli cu nos trabao como Parlamentario pa corigi nan cu e berdad pa nunca pero nunca mas pueblo no cay den e gara di mentiranan di AVP.

Recientemente por a tuma nota cu Mike de Meza, un Parlamentario cu nunca ta na trabao pero ta cobra tur luna un salario cu pueblo ta pag’e, cu cara seco seco a expresa lo siguiente: “Minister buscando credibilidad financiero pero ta habracando credibilidad financiero di pueblo”. Ora bo lesa un articulo di un Parlamentario expresando esaki bo mester para keto y puntra bo mes: Confiro ta pa kico AVP ta tuma pueblo anto?

   Deficitnan bao di Mike de Meza:

Mike de Meza hustamente ta bay den historia pa e minister di finanzas di mas malo cu pueblo a conoce den su historia. Mike de Meza su racha den e promer 4 añanan di AVP a crea un serie di deficitnan nunca bisto. Awe mi ta obliga di publica cifranan di Banco Central di 2010-2014 cual directamente ta cay bou resposabilidad di e “Bobolongo” Mike de Meza.

Na 2010 Mike de Meza, e “bobolongo” maestro den finanzas publico, a presta 188.6 MIYON Florin pa cera e deficit di pais.

Na aña 2011 el a presta 325.2 MIYON Florin pa cera e deficit.

Na aña 2012 e maestro “bobolongo” a presta 443.3 MIYON Florin pa cera deficit di su presupuesto.

Na 2013 esaki tabata 332.8 MIYON Florin di deficit y na 2014 Mike de Meza a percura pa 405.8 MIYON di deficit cual a desemboca den un KB riba Mike Eman y e storia di bebemento di Ensure bao di tent.

Pues Mike de Meza su maneho desastroso cu bendicion di Mike Eman y AVP a conoce un prestamo pa paga nan deficitnan di nan mal maneho financiero di 1.6 BIYON solamente bou maneho di de Meza y ainda falta e parti di Bermudez cual mi no a bay riba dje como cu mi kier splica pueblo absolutamente di e desaster cu Mike de Meza a crea.

E cifranan aki riba pueblo mes por mira nan back den rapport di Banco Central (Statistical Digest 2018). Awe den 2019 pueblo mester paga 232 MIYON solamente na interes riba placa cu e maestro aki di e desaster a ocasiona.

   Un disculpa of pordon?

Con un “bobolongo” asina cu a causa esaki awe tin e pudor di cuestiona Promer Minister di e pais aki, esta Evelyn Wever Croes y tambe Minister di Finanzas actual Xiomara Ruiz Maduro ariba credibilidad financiero? Parlamentario Endy Croes ta sigui splica Mike de Meza cu bo a luci mas como un cabayero si bo a confronta pueblo y pidi pueblo un disculpa of te hasta un pordon.

Bo por a sali bin dilanti splica pueblo cu nunca bo a studia finanzas y no ta compronde cifranan y bo conseheronan a hiba bo na e caminda desastroso aki. Mescos cu dia bo a splica totalmente fuera di contexto den Parlamento entre asset y income di Lotto pa Deporte. Desde e dia ey pueblo a compronde cu bo no ta apto pa maneha finanzas di un pais y kisas por a pordona bo.

   Autor di Mega Debe:

Awe despues di ta e autor di e Mega Debe y si mira aki riba e cifranan publica door di Banco Central solamente di bo maneho, Mike de Meza bo kier culpa otro? Awe bo kier corda riba credibilidad financiero di pueblo? Unda bo tabata 8 aña largo anto? Ora Mike de Meza skirbi den su articulo Friends & Family nos mester puntr’e ken ta Arnold Legrand? Kico e ta di dje?  Ken a nombr’e den Lotto? Ken a nombr’e den RDA? Cuanto placa e intimo amigo aki di Mike de Meza a strica?

Parlamentario Endy Croes ta priminti di lo haci un huiswerk riba esaki y lo bin back riba Friends & Family di Mike de Meza.

Sin lubida Mike de Meza su otro friendsnan manera por ehempel Benvinda da Sousa, casa di ex parlamentario di AVP Desiree Croes.

“Nos trabao ta pa mustra cu hechonan (feiten) con esaki a funciona bao di Mike de Meza y AVP.”

Parlamentario Endy Croes ta termina ripitiendo na Mike de Meza un disculpa of pordon ‘staat bij jou netter!’ Locual bo a haci cu e pais aki pa despues bo lider sali defende bo cu e ta orguyoso  di e debe y e debe t’ey pa nos tur bay pag’e den futuro ta simpelmente sin palabras!! Berdad AVP no ta give a damn.

- Advertisement -

DUNA COMENTARIO

Please enter your comment!
Please enter your name here