Director di IBiSA Monique van Embden:
ORANJESTAD (AAN)—Den entrevista cu DIARIO, sra. Monique van Embden, director di IBiSA, a referi na e bus di salud cu pa hopi aña ta coriendo rond di Aruba, dunando servicio, y door di esey ta rekeri di renovacion y inversion.
E funcionario a comenta cu aworaki IBiSA no tin e fondonan pa haci inversion y a bin cambio di gobierno cu plannan nobo, y como tal ta evaluando di ki manera por sigui duna e servicio di “house screening” manera nan ta yama e servicio aki.
Sra. van Embden a menciona cu locual si ta haci, aunke e bus tin cierto complicacionnan tecnico, e ta sali toch bay na pia di trabao, acudi na cierto eventonan unda nan ta wordo pidi pa haci e “house screening”.
Mientras tanto hunto cu Ministerio di Salud Publico, DVG y e minister nan ta papiando pa wak na ki manera ta mihor pa IBiSA por continua cu e prevencion y informacion di salud.
E servicio di bus a haci hopi bon, sra. van Embden a expresa. El a haci hopi hende conciente di nan propio responsabilidad pa investiga con nan salud ta, si nan tin demasiado peso, con nan ta cu nan presion y nan sucu, pero e problema ta hopi tecnico y practico, y tin di haber tambe cu e recursonan cu tin disponible pa IBiSA por continua cu e servicio den su forma cu comunidad a custumbra cune.
E team di salud tey ainda, pero IBiSA ta den combersacion cu e minister y su conseheronan pa wak na ki forma e servicio ta continua, si ta den forma di un bus of ta bay ta algo na otro localidadnan. E intencion ta pa sigui monitorea e salud di e hendenan den nos comunidad y pa brinda e servicio na IBiSA di informa, educa y haci e ciudadanonan mas capaz pa cuida nan mesun salud.
Sra. van Embden a reitera cu IBiSA su fondonan ta limita, y cu nan mescos cu tur otro departamento mester funciona cu locual nan presupuesto ta permiti. Pero no ta asina cu nan ta bay stop e servicio pa comunidad, pero ta evaluando si nan ta hacie conhuntamente cu otro instancianan di salud of combina cu sector priva. El a agrega cu e minister tin su propio vision al respecto y mester wak cual lo ta e forma pa sigui brinda e servicio aki.
E bus di salud a crea e bentaha di yega na pia di trabao facilitando e personanan cu tin dificultad pa bay haci chekeo di nan presion, sucu, peso, etc. E doñonan di trabao ta sostene e servicio di bus di salud y e tambe ta asumi su responsabilidad como dunador di trabao, pasobra nan ta conciente cu esey ta na bienestar di e trabao y di e trahadornan.
