Home Hudicial Caso di traficacion di droga den container pa Hulanda den Corte

Caso di traficacion di droga den container pa Hulanda den Corte

274
0
SHARE
- Advertisement -

Tin cinco sospechoso

ORANJESTAD (AAN) – E E homber di Sint Maarten biba na Aruba K.R., e Colombiano biba na Aruba H.M.O., e dama R.M.O., e homber Colombiano biba na Aruba C.E.V., e homber Venezolano A.V.A., a bolbe presenta dilanti Hues pa e caso grandi di traficacion di cocaina pa Hulanda. Tratamento di e caso no a sigui y a planea cu 20 September 2019 lo ta e dia cu lo bay dedica pa e caso.

ORGANIZACION CRIMINAL METI DEN DROGA

Algun luna pasa e grupo aki a presenta den Corte caminda Fiscal a acusa e grupo di ta meti den un organizacion criminal cu ta dedica su mes den traficacion di cocaina pa Hulanda.

Fiscal a splica cu ta un investigacion hopi grandi tanto na Aruba como na Hulanda a tuma lugar y e ta calcula cu pa medio Juni 2019 e relato oficial lo ta cla. Ta papia aki di container carga cu cocaina cu lo tabata wordo manda Hulanda.

Recien e grupo aki a bolbe presenta den sala di Corte di Husticia y Hues a bisa cu a palabra caba pa 20 September 2019 lo tin tratamento. Fiscal a bisa cu ta acusa K.R. di traficacion di droga y posecion di droga na su cas. Na opinion di Fiscal, ta sospecha H.M.O. lo a organisa e transporte di droga y a hay’e cu arma. E otronan ta forma parti di e organizacion.

E intencion di cu e sospechoso a presenta den Corte ta pa mira cu awor cu e abogadonan a haya e procesverbaal, si nan ta desea di laga haci investigacion. Hues a puntra e abogadonan si ta desea investigacion.

INVESTIGACION PISA RIBA SOSPECHOSO

Abogado mr. Zara a reclama na Hues cu e caso penal di su cliente H.M.O. di 2008 ta poni den e documentonan di e caso aki tambe. E ta haya cu esey no por. El a Mustra cu ainda e caso di kita propiedad ta andando den Corte Superior. E ta haya cu no mester inclui e caso Domino den e caso aki. E abogado ta haya cu mester saca esakinan for di e documentonan di e caso y tambe di e pareha di H.M.O.

FALTA MAS SOSPECHOSO

Tambe e abogado a cuestiona otro tres sospechosonan cu no ta persigui. Con a para cu nan investigacion y kico Fiscal ta bay haci cu e tres sospechosonan aki.

Fiscal a reacciona cu e ta haya necesario pa mira con H.M.O. tabatin combersacionnan den pasado den e caso grandi di droga Domino. Fiscal a bisa Hues cu e ta haya cu mr. Zara no ta pidi pa mas investigacion pero pa laga documentonan afor di e procesverbaal.

Pa loke ta e cuestion di tres otro sospechoso, Fiscal a splica cu un di e sospechosonan, autoridad tabata sigui su tras pa otro caso y no tin prueba cu e lo ta envolvi den e caso aki. Un di e sospechosonan M. no ta ariba e isla y no sa con lo para.

TRAFICA DEN BLEKI DI CREMA DI COCO

Fiscal a bisa Hues cu investigacion ta mustra cu e grupo aki tabata trafica cocaina den bleki di crema di coco. Ora a bay investiga e blekinan di coco cream cu tabata manda Hulanda a resulta cu tin cocaina den e blekinan.

CASO POSPONI ATROBE

Hues, despues di a scucha e punto di bista di abogado mr. Zara y Fiscal a remarca cu enberdad den Regiezitting ta pa abogado pidi pa mas investigacion y no pa saca documentonan di e caso. Hues a bisa mr. Zara cu e ta kere cu dia 20 September 2019, e lo por trece esakinan padilanti. E caso a keda posponi pa dia 20 September 2019. Manera Fiscal a splica ta e cinco sospechosonan aki so lo tin cu duna cuenta pa e acusacion cu tin contra nan.

 

- Advertisement -

DUNA COMENTARIO

Please enter your comment!
Please enter your name here