Citgo Aruba mester prepara pa desaroyo nobo 

    266
    0
    SHARE
    - Advertisement -

    Informacion y imagen di Directiva y CEO nobo na Merca

    *Aruba tambe ta parti di cifranan di Citgo someti na control

    *Citgo Aruba tambe den e cambio di rumbo despues di Asdrubal 

    ORANJESTAD  (AAN) — Despues cu Hues na Merca a dicidi cu Presidente Juan Guaidó e unico autoridad pa dicidi riba Citgo, e compania na Merca a haya e confirmacion legal cu ta sostene e pasonan cu el a tuma. DIARIO a ricibi e resumen total di pasonan financiero cu ta wordo tuma den Citgo, cu Aruba lo enfrenta den un ambiente diferente for di e momento cu Aruba a drenta den deal cu Nicolas Maduro pa rehabilita e refineria na Aruba.

    Informacionnan cu DIARIO a presenta anteriormente e siman aki, ta confirma den e informacion oficial di gerencia y hunta di directiva di Citgo seis luna despues cu e hunta a wordo introduci dor di Presidente Interino, Juan Guaidó.

    E esfuerso grandi pa stabilisa Citgo a wordo treci dilanti y esencial pa e grupo ta, pa presenta cifranan cu ta indica e caminda cu e compania a subi.

    Den e relato financiero cu a wordo emiti, pago di gastonan ta ocupa e luga central. Ta wordo indica cu e compania a duna inicio na refinanciamento di e cantidad di debe cu regimen Nicolas Maduro a crea pa e compania directamente. Esaki pues no ta trata di borg di e compania pa placa cu Venezuela a uza pero pa debenan cu Citgo mes a haci y di cual parti di e placa no a sirbi interes di Citgo.

    Den e cuadro aki ta menciona e hecho cu ta for di exterior Asdrubal Chavez a dirigi Citgo cu asina a topa cu situacionnan serio.

    Informacionnan clave di e tempo di Asdrubal Chavez, cu kier a haci Citgo Aruba su luga di biba ora Merca a cera porta pa su persona, ta wordo treci dilanti dor di e compania cu ta indica cu e no ta hinca placa mas den e aventuranan di regimen Nicolas Maduro.

    Control riba su placa a bira prioridad pues pa Citgo, cu a bini cu un sistema di control nobo manera DIARIO a splica pa mustra e motibo pa cual Nicolas Maduro tabata tin miedo di cambio den Citgo.

    Un accion di limpiesa ta tuma luga y por deduci cu Citgo Aruba, cu tambe ta parti di Citgo actualmente mester tin informacion caba y mester prepara su mes pa un situacion completamente nobo.

    Buskeda di un solucion pa Aruba no ta wordo menciona den e relato, cu si ta papia di investigacionnan cu ta continua pa determina e totalidad di actonan di corupcion den e compania.

    Pues manera DIARIO a splica no ta solamente Merca, pero Citgo mes ta hiba investigacion.

    DIARIO lo sigui suministra informacion importante na Aruba cu mester prepara su mes debidamente pa loke e desaroyonan den Citgo na Merca lo nifica.

    - Advertisement -

    DUNA COMENTARIO

    Please enter your comment!
    Please enter your name here