Home Hudicial Como 800 kilo di cocaina balora na $24 miyon intercepta den barco...

Como 800 kilo di cocaina balora na $24 miyon intercepta den barco Venezolano

1081
0
SHARE
— Asina e barco Venezolano a cuminza sink. E cocaina tabata bon scondi abordo.
- Advertisement -

ORANJESTAD (AAN): Siman pasa Diaranzon, esta 31 di Juli 2019, un barco Venezolano cu 10 persona abordo, a wordo intercepta door di Guardacosta di Caribe Hulandes, den awanan teritorial di Curaçao.

Ora cu el a wordo detecta, Guardacosta a manda un speedboat tipo Metal Shark rumbo pa e barco y asina a intercepta esaki.

Durante e maniobra cu a para e barco Venezolano, diripiente na un forma misterioso e barco Venezolano a cuminza sink.  E 10 personanan di diferente nacionalidad cu tabata abordo, a wordo rescata, y transporta na pier di Guardacosta di Curacao.  E personanan a wordo entrega na Cuerpo Policial di Curacao.

— Asina a mara e barco na Base di Marina Real na Parera.

E barco cu matricula BVDA-4350, a sink mitar bay abao, pero no a bay full bao awa.  Pesey a dicidi cu ta mara cabuya na dje, y el a wordo lastra y treci na pier door di e cutter Jaguar di Guardacosta.  El a wordo mara na e Base di Marina Real na Parera.

E siguiente mainta, esta Diahuebs 1 di Augustus, a cuminza cu e proceso pa saca tur awa di e barco.  Esaki a socede cu yudanza di buceadonan di Defensa, y tambe Cuerpo di Bombero di Curacao.  Nan a saca tur awa, y despues a hisa e barco for di lama.  E ora a start cu un buskeda rigoroso den dje, cu yudanza di personal di Guardacosta y tambe un team di e barco hulandes Zr.Ms. Groningen, y Douane.

Esaki a resulta den hayazgo di 800 kilo di cocaina, cu tabata bon scondi den un compartimento den e barco.  E droga aki riba caya tin un balor di US$24 miyon.

Riba ordo di Ministerio Publico, e droga aki a wordo destrui, y tur esnan cu tabata abordo di e lancha awor ta poni bao sospechoso di narcotrafico.

Esaki ta e di dos golpi fuerte cu narcotrafico ta hayando den area di Islanan ABC, specificamente cu transporte ilegal di cocaina.

Un dia prome cu esey, esta Diamars 20 di Juli caba, Guardacosta a logra di intercepta como 470 kilo di cocaina abodo di un speedboat tipo Go Fast cu tabata moviendo riba lama panort di Aruba.  E balor di esey tabata como $14.1 miyon.

Pues den un solo siman, Guardacosta a dal narcotrafico un golpi di como 38 miyon Dollar.

- Advertisement -

DUNA COMENTARIO

Please enter your comment!
Please enter your name here