Home Comercio Costo pa haci negoshi a subi asina hopi cu of nan tin...

Costo pa haci negoshi a subi asina hopi cu of nan tin cu absorbe of pase na e consumidor

489
0
SHARE
- Advertisement -

Presidente Asociacion Gastronomico Jan Van Nes:

ORANJESTAD (AAN):  Jan Van Nes, Presidente di Asociacion Gastronomico di Aruba (AGA), tambe a hiba palabra durante e conferencia di prensa teni na KvK, door di e Grupo Comerciantenan Uni di Aruba.

E meta di e conferencia di prensa aki ta pa nan vocifera nan preocupacion tocante e maneho di e ley di impuestonan BBO, BAZV, BAVP.

Jan Van Nes a declara cu e asociacion a yega di vocifera su preocupacion caba ora cu nan a presenta nan estudio di impacto, pa loke ta e impacto economico di tur e restaurantnan na Aruba.

El a señala cu tur e comerciantenan ta canando riba e mesun caminda. E asociacion a manda carta pa gobierno, nan a topa cu e gobernantenan na Cocolishi y nan a wordo bon ricibi, nan a haya cu nan puntonan ta valido y hasta nan a haya disculpa cu anteriormente nan no a wordo involucra den e proceso di e reforma fiscal.

“E ta hasta asina, cu nos a wordo priminti, un dia despues cu nos a topa cu prome minister aña pasa, cu lo wordo instala un task force multi ministerial, cu lo confronta y trata di yega na solucion, na e retonan cu nos industria di restaurant tin. Nos tin como 612 negoshi, mayoria chikito, y nos tin un impacto di casi siete mil trahador”, Van Nes a señala.

El a agrega cu e motibo pa cual Asociacion Gastronomico ta sinta hunto e Grupo di Comerciantenan Uni ta e hecho cu nada a sosode fuera di e bunita disculpanan cu nan no a wordo involucra. Te aworaki e industria di restaurant ta confrontando e mesun retonan y sr. Van Nes a presenta un sumario di e retonan aki.

Aña pasa a wordo introduci e BAVP, cu ta 2.5% cu nan por a pasa pa e consumidor, sinembargo no mester kita e hecho cu nan costo di haci negoshi a subi, a base di esey.

Saconan di plastico a wordo elimina, loke e asociacion ta haya cu ta un bon idea, cu definitivamente ta faborece nos naturaleza y nos tortuganan pero aworaki e restaurantenan ta usando un reemplazo, cu ta mucho mas caro y un biaha mas nan costo di haci negoshi a subi.

Despues a bin acerca e “sintax” cu ta e alza di accijns riba bebida, cu a afecta e negoshi no tanto den e aspecto di biña pero si den loke ta licor. Pa hopi di nan negoshinan esaki a causa cu e 30% di nan benta total di bebida a baha te 20%. Y aworaki, den hopi restaurant ya e bebida faborito di e turistanan ta “Balashi cocktail”, kiermen awa. Esaki tambe a aumenta e costo di haci negoshi.

Banda di esaki, sr. Van Nes a bisa, awor ta bin e sugar tax. Pues personanan cu a scoge a base di accijns di no tuma bebida alcoholico, lo haya atrobe e sorpresa di un alza di prijs. Y tin den pipe line e eliminacion di straws y foam boxes. E ta compronde e proteccion pa e tortuganan, pero ta reitera tambe cu e reemplazo di e materialnan aki ta hopi mas caro pa e negoshinan y nan tin cu absorbe esaki of pase na e consumidor.

Van Nes a menciona cu e industria en general a wordo confronta cu hisamento di costonan, reiterando cu of nan tin cu absorbe esaki of no ta keda otro alternativa cu pase na e consumidor.

- Advertisement -

DUNA COMENTARIO

Please enter your comment!
Please enter your name here