Home Cultura Curso tocante tecnica tradicional di Kalki

Curso tocante tecnica tradicional di Kalki

24
0
SHARE
- Advertisement -

ORANJESTAD (AAN): Stichting Monumentenfonds Aruba (SMFA) a anuncia cu lo cuminsa cu e restauracion di e forno di Kalki  aki exactamente un luna.

E unico forno di kalki cu a keda na Aruba ta den e bario di Rancho ya pa 127 aña despues di a worde construi na 1892. E forno aki ta un di e monumentonan industrial mas importante di nos isla.

Na principio di aña durante un conferencia na Bermuda a logra yega na acuerdo cu Parvenir Heritage Restoration and Maintenance Company Ltd.  pa restaura e forno di kalki segun e sistema tradicional cu uzo di kalki y a la bes combina esaki cu un curso pa localnan por siña e tecnica aki y asina traspasa e conocimento.

E meta ta pa por crea e experticio local pa por ehecuta proyectonan di mantencion y restauracion di otro monumentonan tambe segun e forma corecto.

Cu añanan nos a mira cu e conocimento y experticio poco poco ta desapareciendo y pa medio di e curso aki lo kier trece esaki back.

E oportunidad pa adkiri e conocimento aki ta pa tur esnan interesa pero principalmente personanan cu ta traha den area di construccion, arkitectonan pero tambe doñonan di casnan tradicional cu kier siña e manera corecto pa por aplica e pleister a base di kalki.

Banda di esaki SMFA tambe lo duna oportunidad na personanan buscando un segundo oportunidad den bida. Esaki lo bay via di fundacionnan manera Stichting Rancho y Adopt An Addict pa asina por siña e tecnica aki y haya e oportunidad den futuro tambe pa traha riba proyectonan di restauracion y mantencion di monumentonan.

Por ultimo tambe a acerca EPI pa asina duna tanto docentenan como studiantenan e oportunidad pa siña un tiki mas tocante e tecnica tradicional di uzo di kalki.

E curso ta consisti di un sesion teoretico cu lo ta dia 23 di september y un sesion practico cual lo tuma lugar di dia 24 di september te dia 27 di september. Participantenan cu participa na tur dos sesion lo ricibi un certificado for di Enseñansa pa Empleo.

Personanan interesa pa registra por tuma contacto cu SMFA na info@monumentenfondsaruba.com

Stichting Monumentenfonds Aruba kier a gradici na Unoca y Prins Bernhard Cultuurfonds Caribbean cu a contribui cu fondonan pa asina por haci e curso aki posibel y tambe un danki na partnernan cu a uni na e proyecto aki cual ta Stichting Rancho, Ministerio di Cultura, Enseñansa pa Empleo Aruba, Museo Arkeologico y Parvenir Heritage Restoration & Maintenance Company Ltd.

- Advertisement -

DUNA COMENTARIO

Please enter your comment!
Please enter your name here