ORANJESTAD (AAN): Habitantenan a tende lastramento di brake, sigui pa sonido fuerte di dalmento. Esaki tabata Dialuna marduga riba caminda di Paradera pa Jaburibari.
Mesora yamadanan a cuminza drenta na tanto Polis como tambe Centro di Alarma di e accident pisa aki.
Pesey mes, tanto Polis, Ambulans, y tambe Vehiculo di Rescate di Cuerpo di Bombero a ser manda cu urgencia na e lugar.
Polis a yega prome, y a bin topa un accident entre un GMC Pickup color preto, un Mitsubishi Pickup color blanco, y un Mitsubishi Spacewagon color blanco.
Esnan di e GMC Pickup color preto no tabatey presente. Pero den e Mitsubishi Pickup color blanco tin un dama basta herida, y pa colmo e ta pega y no por sali di e vehiculo. E golpi tabata net na su banda.
Polis a cera caminda, pa asina Paramediconan di Ambulans, y tambe esnan di Vehiculo di Rescate por haci nan trabao.
Bomberonan a corta e porta di e Mitsubishi Pickup, pa asina por a libera e dama herida. Paramediconan mesora a atende cune, y a bay cune Hospital pa examinacion mas extenso.
Na e lugar, Polis a keda encarga pa busca e chauffeur di e GMC Pickup preto cu ta mustra di ta esun cu a causa e desgracia serio aki. E chauffeur a core baha na awa.
Nan a topa cu un pasahero di e GMC Pickup preto si, y asina a papia cune. Sinembargo como cu e chauffeur a core bay, Polis a dicidi na confisca e vehiculo.
Takelwagen a presenta pa asina yuda den e proceso aki. Specialista di Trafico di Polis a acudi na e lugar, pa asina haci un investigacion.
