Home General Di con bushi di lama ta importante pa nos isla (y pa...

Di con bushi di lama ta importante pa nos isla (y pa Caribe)

33
0
SHARE
- Advertisement -

Bushi di lama, cu su spina largo, ta bunita pa wak pero no ta recomendabel pa mishi cu ne. Nan spinanan ta levemente venenoso y por causa infeccion.

Pero bushinan di lama tin un rol importante pa nos region. Specialmente e bushi preto (Diadema antillarum), cu ta un herbivoro importante den Caribe, pa motibo cu e ta come alganan marino. Y haciendo esey nan ta crea luga pa colonianan di coral por expande y crece.

Tin diferente tipo di bushi di lama. Tipicamente nan ta animalnan manera un globo cu spina, di e clase Echinoidea. Den e clase aki tin mas di 950 especie ta biba riba fondo di lama. Nan ta wordo dividi den dos sub-clase cu ta e Euechinoidea y e Cidaroidea (cu tin spina hopi diki manera ‘potlood’). Bou di e sub-clase Euechinoidea, ta existi e famia di Diadematidae. Den e famia aki nos ta haya entre otro e genero Diadema cu 8 especie, di cua un di nan (e Diadema antillarum) por wordo haya na Aruba (y den region Caribense).

Bushi di lama ta specialmente importante pa nos door cu, contrario na otro regionnan rond mundo, e ta un di e tiki especienan herbivoro den lama Caribe. Nan ta alimenta nan mes cu e alganan marino cu ta crece riba (rifnan di) coral strobando e coralnan biba y desaroya saludabel. Den nos region Caribense tin case 20.720 km2 (kilometer cuadra) di rifnan di coral.

Tin estudionan haci cu ta demostra cu nos rifnan den Caribe a disparse pa mas di 50% cuminsando den añanan 70. E degradacion di nos rifnan di coral ta coincidi cu un caida den populacion di Gutu (door di sobre-pesca) y di bushi preto di lama. Cu excepcion di algun rif, e bushinan aki a disparse casi completo den nos region den comienso di añanan 80.

Den henter Caribe tabatin un morto masal di e Diadema antillarum, unda mas di 97% di e bushi preto di lama a muri. For di e tempo aki hopi di e rifnan di coral den Caribe a wordo tapa cu crecemento excesivo di alga marino. E bushinan a wordo contagia cu un malesa, y a muri den un tempo masha cortico mes.

Na Aruba tambe nos a observa un caida den cantidad di e bushi preto di lama. Na 2017 Aruba a dicidi pa proteha e especie aki den un ordenansa nacional. E siguiente biaha bo  wak un di nan den lama, djis corda riba nan importancia y cu nan ta un especia proteha.

Potret: Thiel Photography

Fuente: STRI (Smithsonian Tropical Research Institute)

- Advertisement -

DUNA COMENTARIO

Please enter your comment!
Please enter your name here