ORANJESTAD (AAN): Bo kier haci e estudio pa Maestro di Enseñansa Primario durante aña academico 2020-2021 y no tin diploma sea di HAVO, VWO of MBO nivel 4 pero bo tin minimo 21 aña? Ata bo chens!
Tur persona cu tin desde 1 di september 2020 minimo 21 aña y cu kier haci un estudio na IPA pero
no tin e diploma cu IPA ta exigi, ta bin na remarke pa haci e asina yama 21+ Toets. E 21+ Toets
ta midi si un persona tin e nivel di HAVO y ta conta solamente pa e estudio inicial cu IPA ta
ofrece durante aña academico 2020-2021, esta e estudio pa Maestro di Enseñansa Primario.
Diaranson dia 28 di augustus 2019, IPA ta tene un anochi di informacion na unda lo splica kico e
21+ Toets ta encera. Alabes lo elabora riba contenido y trata ehempel di tarea di diferente
materia cu ta forma parti di e 21+ Toets. E anochi di informacion lo ta di 7or pa 9.30 di anochi y
lo tuma luga na IPA (Isaac Wagemakerstraat 11, San Nicolas).
Durante e anochi aki lo tin oportunidad pa inscribi pa e 21+ Toets. Pa por haci esaki mester trece e papel di registro civil (papel di 5 Florin) y 75 Florin p’asina cumpli cu e gastonan di inscripcion. E ultimo fecha pa inscribi pa e 21+Toets ta dia 1 di november 2019. Despues di e fecha aki no por inscribi mas pa aña academico 2020-2021.
