ORANJESTAD (AAN): Bo ta mira algo peligroso banda di caminda e dianan aki relaciona cu construccion? Of bo ta haya cu e palonan di luz cu ta instala rond di e rotondenan ta demasiado cerca di acera?
Abo como ciudadano, semper por yama of manda email pa Departamento di DTI. Nan tey pa mira e situacion. Nan lo check si berdad tin asunto peligroso na trabao, y lo haci algo.
Segun Anko Koopmans, kende ta Director di Dienst Technische Inspectie, nan tey pa garantiza seguridad na trabao, y nan tin deber pa envolvi otro Departamento tambe! Si acaso nan topa cu hende ilegal ta traha, nan lo raporta esey tambe. Seguridad na trabao mester ta pa tur.
E caminda en general su trafico ta unsafe. Hende no ta costumbra cu loke ta pasa banda di caminda. E topico aki lo bay delibera cu KPA tambe. Hopi trabao banda di caminda, semper tin un Polis presente pa regla trafico pa e seguridad di contratistanan cu ta traha banda di caminda.
Pa e simannan aki, lo bay tin reunion cu DOW, y lo papia riba e asunto aki pa mira con por mehora seguridad banda di caminda, y pa nan pone tiki mas atencion. E Director ta hayando hopi sugerencia di loke ta pasando.
A haya informacion di hendenan cu ta duna awa na e matanan riba Green Corridor, no ta usa pion pa adverti chauffeurnan. Pero ya caba e siman por a mira cu pion ta wordo usa.
Ciudadanonan mester cuminza papia y expresa mas di nan preocupacionnan pa DTI.
Dienst DTI kier duna hopi mas informacion pa tur hende haya sa asuntonan di seguridad. Si bo mira algo cu no ta safe, por comunica cu DTI. Si bo keda boca y wowo cera, ta te ora cu algo socede, e ora numa lo bay actua.
Pesey mes DTI ta trahando pa bin cu ciclo di informacion. Na Juli caba a haci esey.
Prome sesion ta Diahuebs 15 di Augustus 2019 cu e topico “Construccion General”. Esaki ta pa doño/director di compania, y personanan cu ta den ramo di seguridad di e compania.
Di dos sesion ta Diahuebs 22 di Augustus 2019 cu e topico “Traha na Haltura”. Esaki ta pa tur hende cu ta interesa, sea trahador, doño/director, persona encarga cu seguridad, etc.
Di tres sesion ta Diahuebs 29 di Augustus 2019 cu e topico “Informacion pa Evento”. Esaki ta pa tur hende cu ta interesa pa organiza evento, concierto, fiesta, food vendors, etc.
Si bo ta organiza concierto of evento unda bo tin cushina pa bende cuminda, bo mester ta na altura cu DTI tambe ta envolvi eynan! Tin reglamentonan valido pa tur cos, incluyendo uso di botter di gas, etc. Pesey ta vale la pena pa acudi na e anochinan aki.
E sesionnan lo ta for di 6:00 pm te cu 7:30 pm, na e Trainingszaal di DTI na Barcadera 153 (mesun lugar di Keuringslokaal). Tin cu reserva prome cu atende na e sesion prome cu 9 di Augustus 2019. Tin lugar pa 40 persona pa sesion.
Pa reserva tin di contact DTI pa asina ta sigur cu bo cupo ta aden.
