Motor cu ta funciona 90% mas limpi y 80% menos venenoso
ORANJESTAD (AAN) – Den conferencia di prensa, Minister Chris Romero, Titular di Transporte, Comunicacion, y Sector Primario a comenta, relaciona cu e flota nobo di Arubus, cu pa hopi aña Arubus no a haya inversionnan asina grandi.
E mandatario a señala cu, mundialmente, ora ta wordo papia di medio ambiente cada pais ta haci su esfuerzo pa uza gasnan menos dañino, y Aruba tambe ta manteniendo su mes na e standardnan aki.
Romero a duna di conoce cu e busnan aki ta “Euro 5”. Euro Five ta un tipo di diesel cu hopi bus (urbano) ta uza awendia, y cu ta menos venenoso cu esnan ta coriendo na Aruba actualmente, cu ta emiti gasnan mas venenoso.
E busnan Euro 5 ta e unico tipo di busnan patenta cu ta haci e gas 90% mas limpi, y 80% menos venenoso.
Gobierno a scoge pa bay den e direccion aki unda Aruba ta acoge tambe na e reglanan mundial pa proteha nos medio ambiente.
