Home General Empleado di biblioteca Johnny Koolman ta cumpli 40 aña den servicio

Empleado di biblioteca Johnny Koolman ta cumpli 40 aña den servicio

80
0
SHARE
- Advertisement -

ORANJESTAD (AAN): Dia 1 di augustus Johnny Koolman a cumpli 40 aña di servicio den aparato gubernamental. El a cuminsa traha na Openbare Leeszaal en Boekerij den Wilhelminastraat den e departamento di mucha, pero manera tabata costumber e tempo, tabata traha y siña e trabao di tur departamento di biblioteca.

Johnny Koolman a drenta servicio na e bon momento, ya cu e tabata den e prome grupo di 8 empleado di biblioteca cu na fin di aña 1979 a bay Hulanda pa un stage di tres luna den cuadro di capacitacion y preparacion pa intensificacion y ampliacion di trabaonan den edificio nobo na George Madurostraat. Johnny su trayectoria di trabao den biblioteca tabata amplio.

El a traha entre otro na ‘Boekverwerking’, ‘Catalogo’ y ‘Uitleenbalie’ na departamento di adulto. El a fungi tambe un tempo como coordinador di e biblioteca di KIA.

Desde cuminsamento di añanan 90 Johnny a cuminsa traha den e departamento cu ta maneha e coleccion nacional, Arubiana-Caribiana. Aki Johnny a desaroya su conocemento di publicacionnan y otro material cu ta trata Aruba. Un conocemento cu e ta gusta comparti cu coleganan y cu usuarionan cu ta busca informacion den e coleccion di Arubiana.

Johnny ta conoci pa su memoria excelente di tur locual el a lesa y potretnan cu e ta topa den bukinan y otro coleccionnan. Su conocemento y su habilidad di anda cu hende ta resalta den su talento pa yuda investigadornan y studiantenan den nan buskeda di informacion. Johnny semper ta busca e forma pa eleva e calidad di trabao y servicio na nos usuarionan.
Su contacto cu su coleganan tabata semper importante p’e. Hopi aña e tabata miembro di Personeelsraad y asina a yuda organiza hopi actividad pa personal di biblioteca.

E luna aki trabao di biblioteca ta cumpli 70 aña. Johnny tabata den e trabao aki pa mas cu mitar di e 70 aña. E tabat’ey na momento cu Openbare Leeszaal en Boekerij a bira Biblioteca Publico Aruba y despues na 1986 a bira Biblioteca Nacional di Aruba. Awor aki cu Johnny a cumpli su 40 aña di servicio el a dicidi dedica mas tempo na su mes y su famia. Gerente di biblioteca ta desea Johnny tur cos bon y ta gradici Johnny pa 40 aña di servicio na nos comunidad.

 

- Advertisement -

DUNA COMENTARIO

Please enter your comment!
Please enter your name here