ORANJESTAD (AAN): Ya for di momento cu e noticia tristo a cuminza wordo transmiti, cu e semper cariñoso Charisa a fayece, tur amigo y conocirnan a bay den shock, mirando e edad hoben di e dama aki y mas ainda cu e tabata un persona hopi keri den nos comunidad. Specialmente den e mundo di canto y gaita el a trece hopi alegria.
Prome cu a hiba Charisa su ultimo lugar di descanso, a pasa cu su restonan mortal na Serlimar, tanto na Pos Chikito como na San Nicolas, caminda Charisa tabata labora y semper tabata un persona alegre y cu hopi gana di biba, pa asina logra e metanan cu el a pone su dilanti.
Na misa Sagrado Curazon di Jesus, na Savaneta, for di oranan trempan, amigonan y familiarnan a bay spera e yegada di Charisa. Por a mira cu tur su coleganan a para banda di caha como muestra di nan aprecio pa Charisa.
Mescos tabata presente e integrantenan di Banda la Paranda, cu porcierto a interpreta canticanan, cu Charisa tabata canta durante temporada di fin di aña.
Diario cu esaki ta manda palabra di hopi forsa na tur su amistadnan y sigur na su mayornan cu a keda cu un bashi hopi grandi cu e fayecimento di nan yiu muher, Charisa.
Riba combinacion di potret por aprecia algun di e momentonan di e ceremonia funebre den Misa.
