Segun ir. Edwin Jacobs:
ORANJESTAD (AAN) — Den un prome articulo, Matutino Diario a relata un entrevista cu sr. ir. Edwin Jacobs, kende recientemente a defende su tesis cu exito na Universidad di Buenos Aires.
Sr. Jacobs pa su tesis a calcula e impacto di envehecimento y malesanan cronico riba e gastonan di AZV durante e periodo 2015 pa 2035. Aki ta sigui e di dos parti di e entrevista.
DIARIO: Sr. Jacobs a scoge pa calcula e impacto di envehecimento y malesanan cronico, riba nos sistema di seguridad social. Di con e escogencia aki?
Sr. Jacobs: “Nos ta bibando momentonan unico den historia di e ser humano. Nunca antes un gran cantidad di hende ta bibando asina bieu y alcanzando edadnan halto. Aki na Aruba, e record na e momento aki ta di 109 aña. Esaki sigur ta un bendicion y ta resultado di nos manehonan exitoso den salud publico manera programa di vacuna pa baby y mucha y nos avancenan den remedi y den tecnologia.
Envehecimento ta nifica concretamente cu e poblacion di 60 aña of mas, den tempo ta crece tanto den cantidad absoluto como den porcentahe di e poblacion total. Ta conoci tambe cu na momento cu e hende ta birando bieu, e curpa y su organonan ta cuminsa gasta y mester di mas atencion medico. E ta un proceso natural. Pues envehecimento di naturaleza mes lo conduci na mas consumo medico y gasto.
“Di otro banda, paisnan rond mundo ta enfrentando un manifestacion creciente di malesanan cronico. Malesanan cronico un tempo tabata aparece den behez. E ta normal. Pero tin un tendencia fuerte cu malesanan cronico ta apareciendo na edadnan mas hoben. Un parti chikito ta pa motibonan genetico, pero e gran mayoria ta resultado di un estilo di bida cu hopi riesgo. E riesgonan mas impactante ta humamento, alcohol y sobrepeso. E comportacion riesgoso aki ta pone cu mas y mas personanan cu no ta den nan behez, ta cuminsa haya malesanan cronico y ta cuminsa consumi servicionan medico y esaki ta aumenta naturalmente e gastonan medico.
“Mirando e dos tendencia nan aki mundialmente, mi a dicidi di haci un estimacion di nan impacto den nos gastonan di AZV”.
DIARIO: Kico nos por spera pa e gastonan di AZV segun sr. Jacobs su calculacionnan?
Sr. Jacobs: “Pa calcula e gastonan mi a formula diferente escenario caminda mi a asumi cu tin migracion of no. Asumiendo cu no tin migracion, ta implica cu economia di Aruba lo crece masha poco mes y ta yega un momento cu e lo stop di crece. Migracion, si e ta uno demograficamente amicable, lo no tin mucho impacto riba e gastonan total”.
DIARIO: Kico sr. Jacobs kiermen cu un migracion demograficamente amicable?
Sr. Jacobs: “Un migracion demograficamente amicable ta un migracion cu ta tene cuenta cu e situacion demografico di Aruba. Nos pais ta enveheciendo, por lo tanto trece personanan di afor cu ta aumenta envehecimento no ta un migracion demograficamente amicable. Si e lo ta amicable si e ta baha e indicadornan di envehecimento. Ideal lo ta migracion di personanan bao 35 aña, cu ta goza di bon estado di salud y cu ta bin pa traha y yuda expande nos economia. Esey mi ta identifica como migracion demograficamente amicable.
Biniendo back riba e gastonan. Durante 2015 pa 2035, e gastonan di AZV, saliendo di e cobertura di e seguro na 2015, lo sigui aumenta. E aumento aki ta worde impulsa pa e proceso di enbehecimento y malesanan cronico den combinacion. Den relacion cu nos GDP, e porcentahe di e gastonan di AZV lo aumenta y lo pone un presion riba e financiamento di e seguro. Esey ta e cuestion di sostenibilidad”.
Matutino DIARIO lo trece den un siguiente articulo e parti di e entrevista cu ta atende cu sostenibilidad di e seguro di AZV. Nos gradicimento pa Ir. Jacobs, director di SVb pa comporti cu nos poblacion, atravez di DIARIO, e informacion importante y interesante aki.
