Home Policial Fugitivonan Ramirez tabata bon scondi na Macuarima

Fugitivonan Ramirez tabata bon scondi na Macuarima

1177
0
SHARE
- Advertisement -

ORANJESTAD (AAN): E Team special di Recherche cu a worde forma desde e Diahuebs 15 di Augustus cu e duo aki a huy for di Prison di KIA na Santo di Patia.

Nan a logra huy e madruga ey, door di pasa via un buraco cu nan mes a coba patras di e Toilet di nan cel, y asina a logra subi y yega te riba dak, pa finalmente logra pasa over di e muraya y recobra nan libertad.

E rumannan Joander Ramirez y Jorge Ramirez ta wordo considera dos individuo cu no tin respet pa ningun hende.  Nan no ta worry cu nada, y hasta nan mesun famia tin asco di nan.

Recherche a cuminza traha, y na un forma profesional a cuminza cana tras di nan pista.  Esaki a rekeri hopi pasenshi, intuicion, y sigur perdemento di soño pa cana tras di e dos fugitivonan.

Jorge Antonio Ramirez ta naci dia 15 di Augustus 1999, y Joander Anthony Alexander Ramirez ta naci dia 23 di September 2000.  E hecho cu nan ta criminalnan cu ta haya acceso facil pa arma di candela, a pone cu pa dos siman largo diferente negoshi den oranan di anochi tabata pone extra vigilancia pafo por si acaso e dos fugitivonan dicidi na dal un atraco atrobe djis pa haya placa.

E huymento di e rumannan Ramirez, a nifica cu Aruba a experiencia un lamentable hecho cu 5 preso ta huy den 4 luna di tempo for di man di autoridad.  Y e forma con e dos hobennan aki a huy di e seccion “Jeugd-Afdeling” di KIA, ta demostra cu nan a planea esaki pa algun tempo.

E rumannan aki ta sintando castigo pa entre otro Atraco arma. Un di e rumannan a worde condena 9 aña sera, mientras su ruman homber ta tras di trali pa 11 aña.

Pero e pasenshi di Recherche a logra su fruta.  Nan a cuminza ta enfoca riba un adres na Macuarima unda e pareha di un di e fugitivonan ta biba.  E vigilancia cu autoridad a tene na e adres ey, a produci resultado positivo.

Ora cu nan a cuminza haya suficiente prueba cu e fugitivonan Joander y Jorge lo ta eyden, nan a tene un razzia bon planea!  Diamars mainta pa 9:40 am, e Team di Recherche San Nicolas a drenta den accion, y nan a canta “bingo”.

Nan a bin gara y detene Joander Ramirez y e ruman Jorge Ramirez.  Mesora a pone boei na nan man, y nan ta bek den man di autoridad.

E pareha cu ta biba na e cas, a haya malasuerte, y el a keda deteni.  Ta trata di e muher Edgarina Angela.  Como cu e tabatin e fugitivonan aki scondi den cas, e ta violando un ley cu ta hopi pisa!   Polis a splica cu el a viola articulo 2:146 di Codigo Penal di Aruba, y e ta castigable pa un maximo di 4 aña den prison.

Articulo 2:146 di codigo penal ta ilustra, cu e persona cu libera, of e persona cu yuda na liberacion di un persona cu tin un castigo di prison ta castigabel cu maximo 4 aña di prison.

DIARIO sin duda ta kere cu e captura aki despues cu nan tabatin 12 dia liber, ta un tremendo trabao Cuerpo Policial.  Nan a traha incansablemente pa logra pone man riba e dos fugitivonan aki.  Nan a keda como dos siman liber, pero na final a wordo captura bek.

Awor e pareha tambe ta encarcela (por lo pronto na Warda di Polis), y Fiscal a indica cu nan lo bay cay pisa riba esnan cu ta yudando fugitivonan.  Pues Edgarina lo por bay keda pa basta tempo tambe encarcela, djis pasobra el a yuda e dos fugitivonan mas peligroso na Aruba.

- Advertisement -

DUNA COMENTARIO

Please enter your comment!
Please enter your name here