Enfasis: “Hunto nos por logra integridad”
ORANJESTAD (AAN) – Diahuebs gobierno a cuminza cu un campaña di concientizacion atravez di Bureau Integriteit Aruba.
Asina Minister Presidente mr. Evelyn Wever-Croes a declara den conferencia di prensa di gobierno, diahuebs mainta.
Bureau Integriteit Aruba a wordo institui na October aña pasa, cu e meta pa aumenta concientizacion riba kico por y kico no por, den integridad.
E dignatario a reitera cu e bureau aki ta esun cu ta bay tuma melding y rapportnan, y yamadanan di personanan cu kier duna keho di falta y kiebro di integridad.
E mandatario a duna di conoce cu e departamento no ta completamente cla ainda pa tuma yamada. E mester tin e suficiente personal pa traha eyden, cu ta hendenan cu ta traha pa gobierno mes caba, y no empleadonan nobo cu ta bin di pafo ta wordo tuma.
E mester tin hende pa tuma e prome yamada, y tambe pa haci follow up. Minister Presidente a indica cu lo mester duna siguimento di inmediato na cada yamada cu drenta, y si no tin hende pa duna siguimento tur e proposito ta cay na awa.
No obstante, e aspectonan di prevencion y aumento di concientizacion si ta cuminza, y a inicia diahuebs mes, cu un campaña nacional tocante kico ta bon y kico no, kico por y kico no por, kico ta integro y kico no ta integro.
E campaña aki ta cay bao di Bureau Integriteit Aruba, y e Quartier Maker, sra. Amelien Flanegien. E intencionnan aki ta pa concientiza y enfoca mas tanto riba e hecho cu Bureau Integriteit Aruba su so no por logra integridad na Aruba, ni gobierno su so.
E dignatario a subraya cu tin dos cos den wega: esun cu ta ofrece pa kibra e reglanan di integridad, y esun cu ta kibra e reglanan aki. Pesey di tur dos gobierno mester cooperacion si nos kier un Aruba integro, sin corupcion. E enfasis di e campaña aki ta cu “hunto nos por logra integridad”.
