Analisis
Na e momentonan aki Aruba ta den un crisis. Esaki ta nifica cu ta henter Aruba ta pasa mal rato. Henter Aruba mester mira con e ta haci sobrevivi un cartera cu el a pensa cu lo a yena cu placa na 2018, pero awor ta practicamente bashi.
Loke a pasa cu Aruba no ta wega. Esaki ta nifica cu comercio tambe mester biba cu e realidad, cu placa di e pais a wordo gasta na forma iresponsabel y cu placa a caba. Comercio sigur mester biba cu e realidad cu tur hende mester baha gasto pa asina nan por sobrevivi loke gobernacion a laga atras pa otro soluciona.
Pa Comercio e sla ta fuerte. Comercio for di 2014 a bati alarma cu Aruba mester tuma medida. Comercio for di 2014 a mustra cu mester baha gasto di gobernacion y a duna ehempel con por a evita cu awe tur hende ta den problema.
Rapportnan y advertencianan cu Camara di Comercio a emiti a mustra riba loke awe a bira un hecho na Aruba, cu casi a bati bancarota.
Laga nos ta sincero. Si gobierno anterior a subi e debe nacional algo mas, awe ta den fondo di pos Aruba lo ta.
Arogancia di gobierno anterior a percura pa Aruba a haya su mes den e problema total cu e ta aden y cu a haci cu pueblo a biba cu un fantasma di Citgo, pa cual Comercio tambe a adverti.
Continuamente nos a uza documentonan cu Comercio a prepara y a publica, pa haya informacion corecto di loke a pasa cu Aruba.
Awor si Comercio ta pidi Gobierno pa yega na un forma adecuado pa atende e problema y sigur pa evita cu e tin mas gasto pa cobra tur e gastonan, mester scucha Comercio.
Kico lo pasa si henter Comercio dal porta cera? Unda ta cobra BBO? No mester lubida cu ta comercio ta produci placa pa paga BBO for di momento cu su mercancia subi mercado di Aruba na forma limpi.
Ta comercio ta percura pa placa circula y pa cada buelta cu mester paga, wordo paga.
Na 2014 ora gobierno anterior a pidi cooperacion di gremionan pa e bolbe subi BBO pa asina yuda AZV, Comercio a papia palabra cla.
Pero gobierno e tempo a sigui mustra cu ta gobierno ta haci y deshaci.
Esaki ta un di e motibonan cu a manda gobierno cas na 2017 y awor e gobierno actual mester tene cuenta cu Comercio, cu ta produci placa pa gobernacion gasta. si no tin Comercio no tin trabou, no tin produccion y no tin placa di belasting.
Democracia ta exigi pa sigur den e crisis actual tene cuenta cu Comercio cu no por haci gastonan grandi pa cambia henter su administracion. Mester tene cuenta cu Comercio cu fin di luna no por faya cu gobierno cu tin e instrumentonan pa sigura cu su placa si ta sigui drenta.
Kico a pasa cu politiconan cu a malgasta placa di pueblo? Nada! Ainda nan kier sigui.
Kico a pasa cu pueblo cu ta tambe Comercio? Nan mester sacrifica y nan mester tene e placa den circulacion. Si Comercio tranca, wega a caba. Bay puntra hasta Venezuela kico ta pasa ora negoshinan bay malo.
Gobierno mester atende cu comercio, cu mester haya yudansa pa negoshinan cu a tene Aruba cabes riba awa den situacionnan cu no ta Comercio pero politiconan a crea!
