Home Parlamento Gobierno ta sconde BBO riba recibo pa despues introduci “salestax”

Gobierno ta sconde BBO riba recibo pa despues introduci “salestax”

49
0
SHARE
- Advertisement -

Parlamentario Marlon Sneek ta convenci:

ORANJETSAD (AAN): Parlamentario di fraccion di AVP, sr Marlon Sneek a mustra cu su fraccion a dirigi un carta na Minister con ta para cu e scondemento di BBO, ya cu e ta algo cu ta keda biba den comunidad y tin preocupacion grandi pa forma di procede aki di Gabinete Wever Croes.

“E informacion aki pa fraccion di AVP ta importante ya cu nos ta sigui haya informacion cu gobierno kier sconde e BBO aki, pa motibo cu ta intencion di Gabinete Wever Croes pa introduci un ‘salestax’ caminda pueblo ta bay haya su mes ta paga tur dos, pasobra berdad e BBO no ta bay ta riba recibo mas pero e comerciante ta bay hinca esaki  den su prijsnan.

Esaki ta nifica cu tur hende ta keda paga e prijs halto pa productonan y esakinan lo no bay baha cu 6% ora cu kita e BBO for di riba recibo, pero banda di esaki den a pakete di medida cu gobierno ta bay introduci y ta trahando riba dje, lo bin un ‘salestax’ banda di e BBO y riba esakinan fraccion di AVP a manda haci preguntanan pa haya aclaracion.

Segun Sneek, nan ta hayando informacionnan basta concreto cu esey ta e plan cu Gabinete Wever Croes ta bay ehecuta y haci contra di nos cmunidad, gaña bisa cu ta e comerciante ta esun cu mester paga e BBO y no pueblo pa despues bisa pueblo cu no ta pueblo ta paga BBO pero e comerciante pa e ora presenta e salestax na pueblo.

Sinembargo tur cos ta mustra cu pueblo lo sigui paga e BBO sin mira esaki riba su recibo y adhunto lo tin cu paga un salestax riba dje, locual ta bay tin un efecto devastado pa nos comunidad ya cu prijsnan lo bay subi barbaramente y esaki pa fraccion di AVP ta di lamenta.
Esaki pa motibo cu Gabinete Wever Croes no ta transparente y bisa comunidad kico realmente ta e liña di maneho cu nan ta hibando, kico en realidad nan kier haci pero ta insisti pa sigui trece mentira pa pueblo, hiba pueblo den un desaster total.

Ya caba nos por a mira y scucha propaganda di gobierno na varios medio di comunicacion, dunando pabien na pueblo pero pabien di kico nos no sa ya cu unico pabien cu e gobierno aki por ricibi, ta pabien cu nan a caba cu e comunidad aki.

Pabien cu nan a caba cu e poder di compra di e pueblo aki despues cu gobierno di AVP a percura pa drecha poder di compra, caminda prome biaha den historia un gobierno ta duna un aumento den forma di por ehempel un ‘reparatietoeslag’ na pensionadonan y na trahadonan cu a gana un salario minimo for di caha di gobierno.

Asina a garantisa cu e personanan aki realmente nan poder di compra ta bay dilanti y awe nos ta mira un Gabinete Wever Croes ta bin y caba cu tur esaki.

Pa nos sigur esaki ta di lamenta y nos lo sigui condena esaki y keda trece e puntonan aki dilanti y nos ta pidi pueblo pa sea alerto ya cu loke gobierno aki kier ta sconde BBO riba recibo pero lo keda cobra pueblo esaki ya cu e comerciante mester cobra tur hende esaki den e prijs, pa nan por duna gobierno esaki.

Banda di esaki pueblo tin cu prepara su mes pa un ‘salestax’ ya cu esey ta loke Gabinete Wever Croes a acorda cu IMF y pesey nos por mira e rapportnan cu a sali pero ni IMF, Fitch, of Standard & Poors no ta na altura cu e gobierno aki no a cumpli cu nada loke nan a priminti dos luna pasa cu nan a sinta cu nan na mesa.

Fraccion di AVP a haci pregunta riba esaki ya cu pa nos e ta algo sumamente alarmante y ta bon pa gobierno duna claridad na pueblo riba esaki,” lider di fraccion di AVP, Marlon Sneek a declara.

 

- Advertisement -

DUNA COMENTARIO

Please enter your comment!
Please enter your name here