Home General Haya sa mas di e pisca cu yama ‘GUTU’

Haya sa mas di e pisca cu yama ‘GUTU’

267
0
SHARE
- Advertisement -

ORANJESTAD (AAN)-  Gutu ta pertenece na un grupo di pisca, cu segun World Register of Marine Species (WoRMS), por worde dividi den 2 sub-famia. Cada sub-famia ta contene 5 genero di pisca, cu un total di mas di 90 diferente especie (cu ta conoci na ingles como “Parrotfish”).

Pero pa complica cos, na Papiamento nos ta yama algun pisca Gutu, cu no ta parrotfish. Y nos ta uza diferente nomber pa e mesun especie. Gutu tin un papel masha importante mes den nos ecosistema marino y merece nos proteccion.

   Informacion general:

E pisca Gutu ta pertenece na e especie di pisca cu hopi variedad di color, y e tin un boca cu ta parse e pik di un lora. Nan nomber na Ingles ta bin debi na nan boca. Na luga di dientenan tin dos plachi manera e boca di un lora. Cu nan boca fuerte nan ta raspa kita alganan for di piedra y coral, comiendo tambe algun klompi di piedra y di coral.

Mas den nan boca tin otro diente special cu por mula e piedra of e pida coral haci nan fini. Antes nos piscadonan local di islanan-ABC tabata tira e piscanan aki back den lama. Pero ora cu nan a cuminsa pisca cu coleganan di Isla Ariba, esakinan tabata bisa e piscadonan local cu e piscanan cu nan ta tira back tabata “good too”. Asina e nomber Gutu a origina.

   Nan importancia pa nos Ecosistema:

Gutu ta piscanan masha importante mes pa e mantencion y bienestar di nos rifnan di coral. Nan ta come alganan marino cu ta crece riba coralnan morto y piedranan di lama.

Door di e proceso di nan alimentacion nan ta yuda controla e crecemento di alganan marino cu ta competi cu e coralnan bibo, evitando e crecemento masivo di e alganan. Pero e proceso di come pida coral y piedra y mula nan pa come e alga, ta pone cu nan ta produci santo tambe.

Tin zonanan caminda cu piscanan Gutu ta mula asina tanto coral morto y piedra chikito, cu nan produccion di santo di lama ta supera cualkier otro proceso di naturalesa. Algun investigadornan ta calcula cu un Gutu generalmente por produci rond di 100 kg. di santo pa aña.

    Menaza pa Gutu:

Tin por lo menos 11 nomber di Gutu na Papiamento:  Nan ta Gutu di santo, Gutu strepia, Gutu blauw, Gutu berde, Gutu raton, Gutu rabo di gay, Gutu barica di candela, Gutu bok’i sapato, Gutu promente, Gutu kedebe y Gutu macakiño).

Pero esey ta sin menciona e especienan di e famia wrasse cu tambe ta carga e nomber Gutu na Papiamento, aunke nan no ta “Parrotfish”. Pero algun di e nombernan ta e mesun especie cu diferente nomber tambe. Den region di Caribe nan poblacion a disminui basta den e ultimo añanan.

Na algun pais pa mas di 40%! Nan ta bou di un presion grandi di sobre-pesca. Aunke globalmente e piscanan Gutu no ta worde menaza pa extincion, den cierto region nan ta na peliger. Na Aruba tur especie di Gutu ta proteha pa ley.

Potretnan pa cortesia Delajah Boekhoudt.  Fuente di informacion di: Fundacion Portafolio Verde, WoRMS, CARMABI, Piska di ref di koral (W. Nagelkerken), Nomber di Pisca na Papiamento (B. Boekhoudt).

- Advertisement -

DUNA COMENTARIO

Please enter your comment!
Please enter your name here