Home Hudicial Hues a nenga peticion di compania pa retira homber condena pa actonan...

Hues a nenga peticion di compania pa retira homber condena pa actonan inmoral

517
0
SHARE
- Advertisement -

ORANJESTAD (AAN): Recien tabatin un interesante sentencia di Corte den Promer Instancia, caminda Hues ta nenga peticion di un compania pa kita un homber condena pa inmoralidad cu menor di edad for di trabao.

Ta asina cu door cu a publica e caso, Recurso Humano di e compania dia 27 Mei 2019 a kita e persona for di trabao. E persona ta traha como “bus boy” pa e compania. Hues di Corte den Promer Instancia cu den e caso aki ta haya cu no tin motibo di urgencia cu ta hustifica pa kita e persona for di trabao.

   KITA PERSONA A BASE DI CONDENA PA ACTONAN INMORAL:

Abogado mr. Emerencia a representa e persona mientras cu mr. Oomen a representa e compania. E compania su punto di bista ta cu dia 23 di Mei 2019, por a tuma nota den diferente medio di comunicacion cu e persona a worde sentencia door di Corte den Promer Instancia di Aruba pa a comete actonan inmoral cu un mucha menor di edad.

Potret di e persona a sali riba diferente plataforma social manera entre otro Facebook. E compania ta condena e tipo di comportacion aki enfaticamente, cu ta boy contra di e norma y balornan di e compania y cu ta forma un peliger pa e yiunan di e clientenan.

Mirando e persona su funcion di bus boy, e compania ta haya cu e persona tin contacto directo cu clientenan di hotel y nan yiunan menor di edad. E compania no kier tuma riesgo pa laga e persona sigui haci su trabao y a dicidi di caba cu e relacion di trabao di inmediato manera menciona den articulo 1615p di e Codigo Civil di Aruba. E compania a kita e persona 27 di Mei 2019. E compania a cuminsa un caso pa caba cu e relacion di trabao.

   EVALUACION DI HUES:

Hues ta mustra cu segun ley Civil, doño di trabao por cuminsa un caso pa kita empleado for di trabao, siempre y cuando cu tin motibonan di peso.

Hues a bisa cu mester evalua si manera e compania ta mustra riba e sentencia di caso penal ta forma motibo urgente pa kita e persona for di trabao.

   NO MOTIBO DI URGENCIA:

Hues ta mustra cu no ta tur condena den caso penal ta duna motibo di urgencia pa kita un persona for di trabao. Pa cada caso mester evalua tur circumstancianan pa mira si door di e trabao cu e persona ta haci, e delito cu el a worde condena p’e y e castigo cu el a haya, no por worde acepta pa e doño di trabao y e persona no por sigui traha pa e compania.

Teniendo na cuenta e circumstancianan den e caso aki, Hues ta haya cu e persona condena no a duna e compania motibo di urgencia pa caba di inmediato cu e relacion di trabao.

Hues ta mustra cu el a tene na cuenta, cu e delito pa cual e persona a worde condena, a sosode promer cu el a drenta den servicio di e compania. Apart di esaki, e delito cu e persona a haci no tin ningun relacion cu e trabao cu e ta haciendo pa e compania sino a sosode completo den priva. Hues a sigui mustra cu e circumstancia cu clientenan di e compania, cu ta consisti di famianan cu nan yiunan, Hues no ta haya cu e forma di e delito di e persona lo bay afecta e clientenan.

   NO TA BAY MOLESTIA MUCHANAN DI CLIENTENAN:

Na opinion di Hues, e funcion di bus boy ta tapa mesanan cu paña pa “dinner”, sirbi e clientenan durante e “dinner” y despues haci e mesanan limpi. Hues ta haya cu esaki no ta un funcion di confianza caminda e persona ta bin den contacto cu muchanan menor di edad. Tambe Hues a mustra cu semper e persona a traha bon pa e compania. Hues tambe a mustra cu e castigo cu e persona a haya no ta haci cu e lo keda pa un tempo largo sin traha pa e compania.

Hues a bisa cu e compania no a demostra cu si e persona bay traha back, esaki lo por crea mal contento cerca e otro coleganan di trabao of si e coleganan a expresa cu nan no kier traha cu e persona aki. Ariba dje Hues ta haya cu ta obligacion di e compania pa evita cu lo por tin cualkier intrankilidad na e compania.

    SENTENCIA:

Hues a rechaza e peticion di e compania pa kita e persona for di trabao.

- Advertisement -

DUNA COMENTARIO

Please enter your comment!
Please enter your name here