Home General IBiSA preparado e programa deportivo escolar 2019-2020

IBiSA preparado e programa deportivo escolar 2019-2020

10
0
SHARE
- Advertisement -

ORANJESTAD (AAN)— Director di Instituto Biba Saludable y Activo (IBiSA) sra. Monique van Embden, a yama un conferencia di prensa den cual a duna informacion tocante e deporte escolar, cu ta bay cuminza casi pareu cu e aña escolar nobo.

Sra. Van Embden a menciona cu aña pasa esaki a clausura cu e olimpiada escolar cu Minister di Salud y Deporte, sr. Dangui Oduber a bolbe introduci, y cu a resulta hopi exitoso, cu diferente deporte y cantidad di mucha cu a participa, y cu tabata un placer.

“Nos ta spera como tal cu e olimpiada escolar a motiva e scolnan, docente, alumno y mayor pa percura cu e aña escolar aki, cu ta bini, nan ta participa atrobe na actividadnan deportivo.

E team di IBiSA no obstante di e vacacion, tin un periodo caba cu nan ta preparando pa esaki, cu ta un reto tur aña pa nos percura cu e espacio cu tin den e programa escolar, fuera di nos actividadnan deportivo, purba cu tene cuenta cu diferente edad, y brinda un programa atrobe varia, cu ta entusiasma e muchanan”.

Sra. Van Embden a menciona cu tin muchanan cu ta fanatico di futbol, por ehemplo, pero IBiSA kier entusiasma muchanan cu ta prefera deportenan mas individual, manera atletismo.

Tabata presente tambe den e conferencia di prensa, e Hefe di Deporte y Actividad Fisico sr. Edgar (Gachi) Erasmus y sr. William Erasmus, Hefe di e Departamento di Desaroyo di Deporte, y suplente di sr. Edgar Erasmus.

Nan a elabora tocante e programa deportivo escolar, di kico e ta consisti y na ki momento e ta wordo introduci na scolnan.

Sr. Edgar Erasmus a duna un relato di e programa deportivo escolar di 2018-2019, mirando cu aña pasa a re-introduci e olimpiada escolar.

Sr. Eramus a menciona cu e olimpiada escolar di e aña escolar cu ta tras di lomba a resulta hopi bon y exitoso y nan ta hopi contento cu esaki. Un total di 29 scol basico y 11 scol secundario a participa.

Aña pasa tambe a re-introduci deporte pa scolnan preparatorio y seis scol a participa den e olimpiada, pa un total di 46 scol a tuma parti den deporte escolar cu a culmina cu e olimpiada.

Den e structura a duna tur scol e chens pa participa den forma di torneo y despues di esaki nan a clasifica pa na final participa den e olimpiada escolar.

Tabata tin un total di 13 deporte cu e muchanan por a competi den dje, durante e olimpiada y algun di nan ta nobo. Sr. Edgar Erasmus a subraya cu esaki ta wordo organiza pa IBiSA, y nan ta hopi contento cu tur scol cu a participa, y cu a duna sosten na e olimpiada y e ta spera cu pa e aña aki tambe lo haya nan cooperacion y haci di e actividad aki uno grandi y bunita atrobe.

E programa di deporte escolar ta despues di scol, y e tin su retonan pa e muchanan por yega, pero asina mes a resulta hopi exitoso, sr. Edgar Erasmus a subraya.

- Advertisement -

DUNA COMENTARIO

Please enter your comment!
Please enter your name here