ORANJESTAD (AAN): Iglesianan Cristian di Aruba a indica cu na aña 2019 a keda decreta como aña di famia pa gobierno di Aruba. Diferente instancia ta traha hunto pa atende cu famia relaciona cu e crisis social. Berdad, famia ta fundeshi di cualkier sociedad y famia ta e prome institucion di Dios.
Parti di e problema di nos crisis social ta cu poco poco nos a cuminsa bandona e principio di Dios den nos bida diario. Den paisnan desaroya na Europa hende a cuminsa confia den rikesa y a perde confiansa den Dios.
Pa Aruba por surpasa e crisis social cu asina hopi ta papia di dje nos mester bolbe na loke Dios ta bisa. Dios su formula pa sali for di e crisis ta sona di e forma aki. Si Mi pueblo cu ta wordo yama na Mi nomber humiya nan mes y haci oracion, busca Mi cara y bira for di nan mal camindanan, e ora ey lo Mi tende for di shelo, y lo pordona nan pica y cura nan tera (2 Cronicanan 7:14).
Den asunto di matrimonio y famia mester bira for e mal practica di famianan kibra pa violencia y infieldad. Mester reconoce matrimonio como algo sagrado entre un homber y un muhe. Mester reconoce cu no ta estado ta lanta mucha sino ta famia ta lanta siguiente generacion di ciudadanon ehemplar.
Pa realmente resolve nos crisis social, banda di tur locual ta wordo haci caba, Aruba mester bolbe na Dios.
