Relaciona cu e situacion di parkeermeters:
ORANJESTAD (AAN)— Marjorie Vermeer-Luidens, como comerciante, a mustra su preocupacion den entrevista cu DIARIO, tocante e desaroyonan di Aruparking.
Sra. Vermeer a comenta cu semper tabata tin e necesidad, na Aruba, di bin cu parkeermeters, pasobra hopi turista cu ta bishita nos Isla no ta bay den ciudad, pasobra nan ta bisa cu nan no tin caminda pa staciona auto.
El a expresa cu hopi Arubiano ta puntra unda nan ta bay para auto “pasobra e lugar ta bruha”.
E ta haya cu e parkeermeters tabata corecto, y e idea di Minister Otmar Oduber tabata fantastico e tempo cu el a bin cune, pero, originalmente, e placa tabata bay pa un organizacion di comerciante “Business Improve District” (BID) cu a lanta pa nan maneha nan mes. Comerciante mester ta responsable pa su mesun maneho, y traha cu un facilitador cu ta gobierno.
Pero no mester laga tur cos den man di gobierno pasobra gobierno tin hopi tarea di su mes, y pesey e comerciantenan tey, sra. Vermeer a comenta. E organizacion menciona lo a haya tur e entrada cu Parking lo a genera pa nan yuda den e BID.
Pero e minister a bisa cu gobierno mes ta hacie y nan a coi delaster un centimeter y pone parking meter y e resto el a pinta geel pa ningun hende bin. Kiermen el a kibra e idea y a bisa e Arubiano “stay away”.
Sra. Vermeer a menciona cu 50% di e turistanan cu ta bin Aruba ta conoce e Isla miho cu e hendenan local mes, y nan lo a bin den caya laga nan V-auto y keda den e ciudad mes, vooral den oranan di anochi.
E dama a comenta cu e minister e tempo ey Otmar Oduber, a bin cu yen di hende, cu yen di regla, si un Arubano staciona den linea geel nan tabata claim su auto bay cune, pero esun cu pague no ta bin den Caya.
Aunke sra. Vermeer cu e ta encanta cu Minister Otmar Oduber pasobra e ta un homber di accion (“Action Man”) pero el a faya den e aspecto aki hopi erg. El a spanta tur hende y maske e parking meters a keda nan no ta traha mas, y esnan cu ta paga e comerciantenan mes ta bisa nan cu ta free.
E (ex) minister a kita e claim pasobra tur hende a keha, pero e no por reinforce mas tampoco.
“Si nos ta conciente, nos mester kita tur e geelnan y mengua e cantidad di hende cu ta traha na Aruba Parking, y hacie productivo. Solamente e cayanan cerca pone parking meters, pone gewoon blanco, y invita nos pueblo pa bin bek. Nan ta para un tiki leu y nan ta cane manera semper”, sra. Vermeer a señala.
El a agrega cu gobierno ta haya e placa y por laga comercio manehe y hisa e tarifa pasobra e ta haya cu 2 florin ta poco. Hende lo pague si nan kier bin den Caya.
E ta haya jammer cu gobierno no ta yama e comerciantenan den Caya pa sinta cu nan y papia riba e tema, y esey ta pasobra nan no ta uni, y no tin un organizacion aworaki. E ta kere cu gobierno mester sinta cu nan y wak con nan por carga esaki hunto.
Nan lo apoya e parking meters si nan ta cerca y esnan geel lo wordo kita. Hasta comercio por paga pa e parking meters di e clientenan pasobra nan kier pa nan bin cerca nan. Vermeer-Luidens a expresa cu e fracaso grandi di sr. Otmar Oduber ta cu na e momentonan ey, e leynan no tabata cla.
Como ehemplo, sra. Vermeer a bisa cu si nan a claim su auto y e lo a hiba gobierno dilanti Huez y e lo a gana. E ta spera cu den e transcurso awo e leynan tey, pasobra despues di un eror asina grandi hunto cu ceramento di Caya, cu el a mata e comerciantenan, awo lo duna nan un chens pa hala rosea bek.
Si Minister Romero bin awor y bisa cu e ta bay kita tur e lineanan geel di parking meters, e lo gana su voto. “Duna nos bida bek, pa nos atrae nos Arubianonan bek. Kita e geelnan por fabor, y pone claim pa e resto”, sra. Marjorie Vermeer-Luidens a conclui.
