Home Turismo Mester keda conciente cu turistanan ta haya Aruba a bira caro

Mester keda conciente cu turistanan ta haya Aruba a bira caro

270
0
SHARE
- Advertisement -

Ronella Tjin Asjoe, CEO di Aruba Tourism Authority

ORANJESTAD (AAN): Di 2011 te aworaki, ATA a midi e costo di un vakantie pa Aruba compara cu otro destinacionnan den Caribe cu nan ta considera como competencia directo, un total di cinco pa seis destinacion.

Den tur dos biaha, y un di nan a tuma lugar recientemente, tur dos biaha Aruba su costo total a score net meimei, kiermen cu tin destinacionnan, cu ATA ta considera como un competencia pa Aruba, cu ta mas caro.

No obstante, Sra. Tjin Asjoe a bisa cu tambe tin hopi otro opcion nobo pa consumidor di awendia cu ta hopi barata, pensa riba destinacionnan manera Punta Cana, Cancun, all-inclusive, pa diferente motibo tambe. Nan tin diferente estrategia y hopi camber pa yena, nan tin otro retonan tambe y consecuentemente prijs ta baha pa yena cambernan tambe.

Estrategia di Aruba, despues di loke a wordo detecta den investigacionnan riba con nos ta posiciona, ta cu gradualmente nos lo sigui crece den volumen. Si compara y pone den contexto total di tur e añanan cu nos ta den turismo, si ta bay tin crecemento di volumen, nan ta conciente di esaki, pero no lo ta di mesun manera cu a tuma lugar den añanan anterior, ora cu Aruba a dicidi di desaroya turismo.

E estrategia principal semper tabata pa cada bishitante laga mas atras, y pa atrae e bishitante di e profil cu por laga mas atras. Nan a traha duro riba esaki, y nan ta midi’e, pero esey kiermen cu mientras bo ta atrae e tipo di bishitantenan aki, consecuentemente cu otro ofertanan cu tin eyfo, cu ta hopi agresivo y bentahoso, y hecho cu consumidornan awendia ta hopi mas mihor informa, e por compara prijs, mester keda enfoca riba eleva calidad di experiencia di e vacacion y duna nan e sentimento cu nan a haya mas pa nan placa. Pasobra ta pidiendo nan pa paga mas y mas.

Tjin Asjoe a agrega cu emberdad turistanan ta wordo pidi pa paga mas pa diferente motibo y nan sa cu e costo di haci negoshi a subi y un di dos factor cu e ta trece dilanti ta cu for di 2011 y a keda basta consistente, e turista cu ta bin Aruba a wordo pidi na varios occacion pa paga fees nobo, aumento di impuesto exclusivo pa turismo. El a menciona como ehempel un aumento den ‘room tax’, como tambe airport tax, aumento di impuesto pa bishitantenan cu ta bin for di barconan.

E turista no solamente ta experencia un Aruba cu pa tur hende en berdad diferente costonan a subi, pero nan tambe tin diferente fees cu ta exclusivamente pa nan.
E di tres factor pa loke ta trata e prijs y aumento di prijs tambe ta riba hecho cu demanda ta fuerte, esaki ta wordo refleha cu e bishitantenan ta mustra di ta dispuesto pa sigui paga prijs mas halto, pero esaki ta mara cu satisfaccion, cu ta hopi halto ainda pa Aruba.

Aruba tin un porcion di nan bishitantenan mas halto den Caribe cu ta ripiti, nan conoce Aruba hopi bon y nan sa kico e prijsnan ta y nan mes ta compara esaki, pero tin hopi ‘first-timers’ tambe, un di gruponan principal den estrategia di ATA. Nan ta compara cu e ofertanan di otro destinacionnan, pero e experiencia cu nan ta pasa na Aruba ainda ta di un satisfaccion hopi halto.

ATA ta boga pa keda bin cu cosnan nobo y diferente, scucha loke turistanan kier, keda inverti den nos producto y servicionan. Mester keda conciente si, cu un porcion di nos turistanan por keha cu Aruba a bira demasiado caro y loke nan ta paga no ta cuadra mas. Kiermen nan no ta sinti cu nan a haya balor pa nan placa. El a enfatiza cu esaki no ta un tendencia alarmante, pero si mester keda conciente di esaki.

- Advertisement -

DUNA COMENTARIO

Please enter your comment!
Please enter your name here