Home Enseñanza Minister Rudy Lampe cu palabranan di elogio pa tur maestro y bon...

Minister Rudy Lampe cu palabranan di elogio pa tur maestro y bon deseo pa aña escolar nobo

9
0
SHARE
- Advertisement -

ORANJESTAD (AAN) – Dialuna mainta a tuma lugar e conferencia di prensa di gobierno, cu participacion di Minister di Enseñanza sr. Rudy Lampe, kende tabata tin como invitado special sr. Richard de Mey, un Arubiano Linguista cu ta destaca den exterior y cu a recibi, den e Estado di Connecticut, e distincion como Mihor Maestro di Idioma pa henter e Estado, y cu ta e prome stranhero na ricibi e distincion aki. Sr. de Mey tambe a hiba palabra.

Minister Lampe a expresa cu e aña escolar 2019-2020 ta na punto di cuminza y el a expresa su palabranan di elogio pa e maestronan. E dignatario a subraya cu el a mira diferente maestro e fin di siman cu a pasa, haciendo e trabaonan di preparacion necesario na e diferente scolnan, y a mira nan dedicacion.

“Hopi hende no sa, cu nos maestronan di nan mesun cartera sa cumpra material pa nan alumnonan, y tambe di nan mesun cartera hopi biaha nan ta yuda pa, asina aki, nos muchanan di menos recurso por haya un desayuno of algo pa come. Hopi di nos maestronan ta contribui den silencio, y nos mester expresa nos palabranan di gradicimento na nan. Y nan ta preparando full speed”, Minister Lampe a expresa.

El a reitera cu e mes a mira con diferente maestro a sacrifica nan vacacion pa haci e preparacionnan necesario y agrega cu e sa cu nos maestronan dedica aki, tin cu traha bao condicionnan dificil.

“Aruba ta limita pa loke ta e parti financiero y hopi biaha nos no por ofrece na nan e condicionnan optimal cu nan por funciona. Nos ta bay cuminza e aña escolar aki, cu scolnan cu ainda no tin airco. Nos no a logra ainda pa tur scol di Aruba haya airco, y nos sa cu e luna di September ta bay ta un luna cu hopi calor. Kiermen, nos palabranan di admiracion y comprension pa nos maestronan, cu apesar di condicionnan adverso no ta give up y ta sigui traha pa nos muchanan”, e mandatario a señala.

Minister Lampe a desea tur maestro tur clase di exito den e aña escolar nobo aki y ta spera cu nan topa tambe momentonan di alegria den nan profesion. El a expresa cu manera ta wordo bisa “mucha ta trece alegria na cas y mucha ta trece alegria den klas tambe”. Esaki pasobra nan ta reacciona “out of the box” y esey ta haci cu maestronan por disfruta di nan profesion tambe, na e momentonan aki di alegria di apertura di un aña escolar nobo.

- Advertisement -

DUNA COMENTARIO

Please enter your comment!
Please enter your name here