ORANJESTAD (AAN): Ultimo dianan a sali dilanti, con algun ciudadano ta denunciando un caso di fraude, cometi pa un homber Dominicano.
E ta actua como un “con-man” unda e ta gana confianza di su victimanan, cu promesanan falso cu e por fix Paspoort y tambe fix Tereno a cambio di sumanan grandi di placa pa su servicio y e costo. E tabata bisa nan cu e ta haci esaki via Ministro di Infrastructura.
Siendo cu tur hende sa cu Paspoort ta un asunto di Reino Hulandes.
Problema ta cu ora cu poco-poco e victimanan a cuminza sali dilanti relaciona cu e caso aki di fraude. Di e forma ey a bin sali na cla, cu e homber Dominicano aki di fam Corona lo a dal hopi hende un cara abao masha mahos mes. Y mayoria di nan ta su mesun compatriotanan.
Riba Diaranzon, pa loke ta e caso di presunto actonan irregular tumando luga cu tereno, Minister ta enfatisa cu ningun di e personanan envolvi den e acusacionnan aki ta traha pa Gobierno y no tin ningun vinculo di trabou cu nan.
Despues cu siman pasa Ministerio di Desaroyo Teritorial, Infrastructura y Medio Ambiente a tuma nota di un denuncia publico had pa un ciudadano cu fam Morales, cu lo ta indica cu tin actonan iregular cu su persona lo a encontra su mes aden cu un otro ciudadano di fam Corona, Minister a instrui, inmediatamente, director di DIP pa haci un investigacion interno ariba dicho declaracionnan.
E siman aki a sali publica un otro denuncia publico di un ciudadano di fam Rodriguez contra e mesun persona anteriormente identifica cu fam Corona.
Pa e motibo aki, Minister diamars atardi a instrui director di DIP pa no solamente haci un investigacion interno mas profundo na DIP, pero tambe a instrui e director di DIP pa entrega un keho formal na Ministerio Publico pa posibel soborno y/of fraude den cual un of otro di e personanan ariba menciona lo por ta envolvi.
Banda di esaki a laga prohibi entrada di dicho personanan, na edificionan di DIP, to ora cu e investigacion termina. Ministerio ta bolbe enfatisa cu ningun di e personanan envolvi den e acusacionnan aki ta traha pa gobierno y no tin ningun vinculo di trabou tampoco cu nan. Por lo tanto Ministerio ta distancia su mes totalmente di dicho acusacionnan y ta tuma e pasonan necesario pa subraya e integridad di e departamento di DIP.
