ORANJESTAD (AAN): Diabierna atardi a tuma lugar e tradicional Spantenbier pa e edificio di utilidad, cu ta bao construccion pabao di Aeropuerto, y cu ta forma parti di e proyecto Gateway 2030, cu ta expande e aeropuerto di Aruba.
E edificio di utilidad lo bay wordo uza pa hinca 6 unidad di Airco chillers y tambe 2 generator grandi, pa asina suministra airco pa full e edificio, y tambe coriente den caso di emergencia.
Ministro di Turismo Dangui Oduber tabata presente, y el hunto cu CEO James Fazio di AAA NV a hisa simbolicamente e bandera di Aruba riba dak.
Ministro Oduber den un discurso, a mustra cu e proyecto di Gateway 2030 ta uno hopi importante pa turismo y pa economia di e isla. E proyecto ta yuda e GDP, y e momento aki Turismo mester di e expansion di Aeropuerto.
E titular di Turismo a splica cu Aruba keto bay ta den e Top 5 paisnan den Caribe cu ta generando mas turismo, y pesey e proyecto aki lo yuda keda desaroya e logro aki.
Ministro Dangui Oduber na nomber di Gobierno a gradici tur contratista cu a yuda den e proyecto aki, specialmente di e Utility Building, esta Ballast Nedam, C2, Robertson Fire Protection, CHS Technical Contracting, y Bopel NV. Tambe e ingenieria cu a participa, esta Hill International BV, y e diseñador cu ta NACO Netherlands Airport Consultant, y e companianan estatal NV Elmar, WEB Aruba NV, DOW, y tambe DTI. El a felicita e trahadornan cu a traha ultimo lunanan pa asina yega e punto mas halto.
Na final di e atardi, algun di e trahadornan a bay saca potret cu Ministro tambe.
