Home Hudicial No tin prueba cu e dos sospechosonan a tira riba homber

No tin prueba cu e dos sospechosonan a tira riba homber

60
0
SHARE
- Advertisement -

Abogadonan ta cuestiona cu investigacion no tabata suficiente

ORANJESTAD (AAN)  – Abogado mr. Carlo y abogado mr. S. Kock a critica e forma con e investigacion di Polis a tuma lugar contra e dos sospechosonan C.M. y L.F.M. E abogadonan ta haya cu tin hopi duda y no tin prueba concreto cu ta mustra cu ta C.M. y L.F.M. a tira riba R.C.

Nan a pidi Hues pa declara e dos sospechosonan liber. Hues awor ta bay studia e caso y otro luna por spera sentencia. Manera DIARIO a publica, e tratamento di e caso tabata hopi largo y pesey a publica e tratamento y exigencia di Fiscal den un articulo y awor ta publica e defensa di e abogadonan despues di a scucha e exigencia di Fiscal di 8 aña di prison pa cada un.

DEFENSA ABOGADO MR. CARLO

Mr. Carlo a cuestiona fayo di investigacion di Polis pa logra cu C.M. ta sera. E abogado ta haya cu ta un set up Polis a haci pa riba e pechi cu a haya lo tin C.M. su ADN. El a bisa Hues cu C.M. a bin cu su pechi cu e tabatin bisti. Ta sospecha cu Polis a pone C.M. su DNA den e pechi. Mr. Carlo a bisa Hues cu e ta haya cu mester declara Fiscal no admisibel.

El a bisa cu for loke Fiscal a presenta di pruebanan, tin 5 punto cu tin duda.

E abogado a bisa Hues cu e tempo cu ta menciona cu e tiramento a tuma lugar, ta diferencia hopi segun declaracion di e testigonan. Segun e victima e tiramento mester a sosode mas o menos 9.30 di anochi. Sinembargo segun camera den e supermercado, ta mira C.M. den e supermercado e ora ey. Segun doño di e scooter A.K., 9.45 el a busca C.M. na e supermercado pa fia e scooter. E abogado ta haya cu esaki no ta cuadra.

E forma cu ta bisa cu C.M. tabata bisti no ta cuadra cu loke C.M. tabata bisti.

E pechi cu Polis a haya, no ta esun di C.M. E tabatin su pechi bisti.

E abogado a mustra cu e scooter cu Polis a confisca no ta e scooter cu A.K. a fia C.M. Esun di A.K. ta otro marca compara cu esun cu Polis a confisca.

E abogado a mustra un otro scenario esta cu lo tabatin un otro persona cu un pechi. A haya un cadena di oro cu ta sospecha di ta di C.M. pero DNA ta mustra cu no ta di sospechoso. E abogado a puntra, pakico no a haci DNA riba scooter? Polis a duna e scooter bek.

No por bisa cu a reconoce stem di C.M. E sospechoso a bisa cu e no tin cellular y con por ta cu ta scuch’e. E abogado a bisa Hues cu e ta kere cu R.C. ta mustra riba C.M. pasobra nan tur dos ta bende droga y asina e lo pone C.M. un banda. Mr. Carlo ta haya cu mester declara C.M. liber.

DEFENSA ABOGADO MR. KOCK

Mr. Kock a bisa Hues cu e ta haya cu L.F.M. no tin nada di haci cu e caso aki. E persecusion a sosode a base di denuncia di R.C. Un agente lo a reconoce L.F.M. ta riba scooter. E abogado tin hopi duda. El a mustra cu Polis tabata coriendo den patruya y a mira L.F.M. pasa tras sinta riba scooter.

E abogado a bisa cu ta papia cu ambos sospechoso tabatin tas di heup pero no a haya ningun tas di heup.

E abogado a mustra cu tabata hopi scur e anochi ey y for di imagennan di camera di seguridad, por a mira dos homber riba un scooter pero no por a reconoce kende nan ta.

E abogado a bisa Hues cu ni C.M. y L.F.M. conoce otro.

Na opinion di mr. Kock, Polis ta purba tur manera pa envolvi L.F.M. den e tiramento aki pero L.F.M. no tin nada di haci cu esaki.

Si e victima ta bisa cu un siman pasa a purba dal’e mata cu auto y e auto a bay dal un caminda, pakico no tin un raport riba e auto.

E papia cu a scucha cu C.M. ta mustra cu ta C.M. ta esun cu a tira y no L.F.M. E ta haya cu no tin prueba suficiente. Tin indicacion indirecto y no tin prueba cu L.F.M. tabata hunto cu C.M. E abogado a caba cu Hues mester declara L.F.M. liber.

Awor Hues ta bay studia e caso y otro luna por spera sentencia.

 

- Advertisement -

DUNA COMENTARIO

Please enter your comment!
Please enter your name here