Home General Nos sistema di seguridad social tin un reto grandi di sostenibilidad

Nos sistema di seguridad social tin un reto grandi di sostenibilidad

93
0
SHARE
- Advertisement -

Ir. Jacobs ta mustra:

ORANJESTAD (AAN) — Den dos articulo anterior, DIARIO a presenta relato di nos entrevista cu sr. ir. Edwin Jacobs, director di Banco di Seguro Social, relaciona cu e defensa di su tesis pa saca su maestria den gestion actuarial na Universidad di Buenos Aires.

Den e ultimo articulo aki, DIARIO lo presenta e parti di e entrevista cu ta enfoca riba e sostenibilidad di nos sistemanan di seguridad social.

DIARIO: Anteriormente sr. Jacobs a elabora riba e dos desaroyonan mundial cu ta aumenta gastonan di Seguridad Social rond mundo, esta envehecimento y malesanan cronico. Si DIARIO a comprende bon, sr. Jacobs den su estudio a analiza tambe si den tempo e sistema aki ta keda pagable. Esaki ta corecto?

Sr. Jacobs: “Esey ta completamente corecto. Despues di a proyecta e gastonan y e visualiza e impacto di envehecimento y malesanan cronico riba e seguro di AZV, a pasa pa proyecta e entradanan di AZV.

AZV ta ricibi su entrada mediante tres fuente: primanan, BAZV y contribucion di gobierno. Ora studia e tres fuentenan aki, lo constata cu tur ta depende di loke nos ta produci como pais, esta nos GDP. E variable den e 3 fuentenan ta e contribucion di gobierno. Despues di kita primanan y BAZV di e gastonan, loke resta gobierno tin cu cubri. Pesey, si AZV ta keda pagable den tempo ta bira un asunto di sostenibilidad di finanzanan publico.

Gobierno den tempo por cumpli cu su aportenan proyecta? Pa evalua esey nos mester tuma na consideracion dos criterio: E efecto di e aumento di aporte di gobierno riba debenan publico y e impacto riba loke nos ta yama presion fiscal”.

DIARIO: sr. Jacobs, prome cu pasa pa elabora riba e parti ey, sr. Jacobs por a splica kico exactamente e concepto sostenibilidad ta nifica?

Sr. Jacobs: “Interesante e parti ey y e ta tambe esencial. Segun definicion internacional, un maneho actual ta wordo considera sostenible si den tempo por mantene e maneho mescos, sin cu ta bin un desbalance entre e gastonan y entradanan. E ora ey, bo por papia di un maneho pagable den tempo. Pa determina sostenibilidad ta necesario realiza proyeccionnan riba termino largo. Y ey mi estudio sigur ta duna un contribucion balioso den e proceso”.

Awor, di con nos mester percura pa nos manehonan actual ta sostenible? Aki tin dos hustificacion pe: E prome ta loke nan ta yama e hustificacion di eficiencia. Esaki ta encera cu generacionnan di futuro tin e derecho di paga mes hopi belasting cu nos. Pues e peso pa futuro no por ta mas halto cu awor. Di dos tin e hustificacion di igualdad entre generacionnan. Esaki ta bisa cu no ta husto pa generacionnan actual pasa peso di nan gastonan actual pa generacionnan den futuro. Pues, nos generacion awor tin obligacion di duna e futuro generacionnan un oportunidad pa biba mescos cu nos.

Esey den corto ta loke ta encera sostenibilidad”.

DIARIO: Awor ey sr. Jacobs a menciona presion fiscal, kico esaki ta?

Sr. Jacobs: “Presion fiscal por keda dividi den presion fiscal realiza y presion fiscal necesario. Presion fiscal realiza ta e porcentahe di e GDP cu obligatoriamente ta keda kita di cuidadano. E ciudadano no tin e escogencia si e ta page of no. Pago obligatorio ta tur e tipo di belastingnan, e primanan cu ta wordo paga na SVb y AZV. Pues tur entrada di loke nos ta yama sector colectivo. Y presion fiscal necesario ta tur e gastonan di e sector colectivo. E diferencia entre e dosnan aki ta resulta den bahamento of subimento di reservanan of aumento di debe publico.

Y ora ey, nos ta analiza sostenibilidad, e idea ta cu e generacion futuro tin derecho di tin mesun presion fiscal cu awor.

DIARIO: Y e resultado di sr. Jacobs su estudio riba esaki?

Sr. Jacobs: “For di mi estudio ta sali cu e aumentonan di gasto di AZV durante 2015 pa 2035 lo conduci of na aumento di debe publico of na aumento di presion fiscal. Aumento di debe publico no ta cuadra cu e maneho fiscal di gobierno y aumento di presion fiscal tampoco ta deseable for di punto di bista di eficiencia. Por lo tanto, e conclusion basa riba e proyeccionnan, saliendo di e cobertura y forma di financiamento di AZV di 2015, ta cu e seguro no ta sostenible”.

DIARIO: Ok. Un conclusion hopi cla. Kico ta sigui awor sr. Jacobs? Conociendo sr. Jacobs nos ta kere cu sr. Jacobs lo haci algo cu e resultadonan aki.

Sr. Jacobs: “Loke ta sigui tin dos componente: Prome ta cu e estudio aki ta pasa forma parti di e sistema di monitoreo cu SVb tin pa Seguridad Social. Basa riba e sistema di monitoreo aki, nos ta identifica e riesgonan pa e seguronan cu SVb ta administra y ta conseha gobierno riba esakinan. Cu esaki SVb ta dal un stap mas den profesionalizacion di su maneho.

Di dos, nos a cuminza cu duna informacion na instancianan cu ta interesa di haya mas informacion riba loke nos sistema di monitoreo ta indica. Te awor nos a haci presentacion caba na Alto Colegionan di Estado y na partnernan social”.

DIARIO ta gradici sr. Jacobs pa e disponibilidad y pa amplia riba su estudio. No ta resta nos cu desea sr. Jacobs y equipo hopi exito.

Di e forma aki Diario a presenta un serie di 3 entrevista cu sr. ir. Edwin Jacobs pa asina informa nos lectornan di un area asina importante pa nos comunidad.

- Advertisement -

DUNA COMENTARIO

Please enter your comment!
Please enter your name here