Home Parlamento “Nos ta papiando cu Hulanda, pasobra nos no por acepta un atentado...

“Nos ta papiando cu Hulanda, pasobra nos no por acepta un atentado contra nos estado di derecho”

603
0
SHARE
- Advertisement -

Adi Thijsen:

ORANJESTAD (AAN): Diahuebs merdia Presidente di Parlamento Adi Thijsen y lider di fraccion di MEP Rocco Tjon a bishita representacion di Hulanda na Aruba VNO y na salida di nan reunion eynan Thijsen a papia cu prensa.

E presidente di Parlamento a splica cu e y Tjon a entrega un rapport na VNO cu nan a traha.

“Den e rapport nos ta trece dilanti e problemanan existente riba e parti financiero, economico y social”.

“Nos a yama e rapport: ‘Aruba terug op de rails van deugdelijkheid van bestuur en deugdelijkheid van financieel beheer’.

“Esta Aruba riba caminda di bon gobernacion y bon maneho financiero”.

“Nos a hasi uso di consehonan di Raad van Advies, rapportnan di Algemene Rekenkamer y te hasta consehonan di Caft y di Banco Central”.

Esaki segun Thijsen, kende a indica cu e rapport ta duna un impresion di con Aruba tabata, con Aruba a cay den e problemanan y con ta solucionando e problemanan.

“Nos a scucha Hulanda ta papiando di posiblemente bin cu un Koninklijk Besluit (KB) y pesey nos kier a pone bon cla cu nos ta un pais autonomo den Reino Hulandes”.

“Tin un diferencia grandi entre Aruba cu Corsow y St. Maarten”.

“Nan posicion ta otro, pues nan relacion ta diferente”, segun e Parlamentario.

“Den e caso aki nos a cambia un ley cu ta e ley di LAFT”.

“Como Parlamento nos tin e derecho pa hasie a base di constitucion y niun rato so un protocol cu a wordo firma pa dos Gobierno por hala un parlamento un banda”.

“Nos a enfatiza esaki y nos a indica cu si bo ta papia di respeta derechonan fundamental di ciudadanonan, e ora ey nunca bo por traha cu un ley cu ta contra constitucion”, segun Thijsen, kende a splica cu e y Tjon a splica e representantenan di Hulanda kico mas nan tin cu hasi.

“E conseho di Reino di Hulanda ta haya cu esey no por, pasobra nan a sinti cu nos a kita un tarea di nan”.

“Tabata tin un compromiso entre Aruba y Hulanda, unda cu Aruba lo bay bao di supervision, pero pa un periodo defini di 3 aña”.

“Aruba mester a bin bek riba rails despues di 3 aña, pero e problema ta cu esaki no a sosode”.

“Aruba a desvia mas ainda, unda cu e debenan a bira 93%, pues a bin mas problema economico, financiero y social”.

“Nos pregunta ta tambe, con esaki por a pasa den e 3 añanan, si tabata tin un supervision(toezicht)”, segun e parlamentario, kende a indica cui esaki lo mester nifica cu e conseho di Reino tambe tin parti den dje.

“Nan no mester bin cu e menaza di un KB, pasobra asina nan ta trece un inkietud den pueblo”.

“Si bo ta un hende cu ta kere den democracia y toch bo hasi esaki sin tin un base pa hasie, bo ta hasi un atentado contra e estado di derecho”.

“Esey ta algo cu nos no por acepta y pesey nos ta den dialogo cu nan”, segun Thijsen.

 

- Advertisement -

DUNA COMENTARIO

Please enter your comment!
Please enter your name here