Merca tin weekend liber di Tax pa material di scol:
ORANJESTAD (AAN) — E costo di bida halto cu nos ta enfrenta na Aruba, ta afecta e mayoria di nos comunidad, debi cu e BBO, BAZV, BAVP riba cada producto pa scol ta haci cu nan presupuesto no ta yega.
Mayornan cu tin mas di un yiu den edad escolar ta haci nan maximo esfuerzo pa cumpra te unda nan por, pasobra no tur ta haya subsidio di gobierno pero un y tur ta worde afecta pa e costonan halto di uniform, tas, zapato, material cu ta cumpra den boekhandel, y sin duda loke nan ta cumpra pa e mucha come y bebe den pausa.
Algun mayor ta comenta na DIARIO cu pa nan ta un sacrificio hopi grandi y cu nan ta prefera di no busca cierto ofertanan pasobra pa experiencia nan sa cu hopi biaha e articulonan ta resulta di mal calidad, vooral paña y zapato.
Lo ta un bon idea di den futuro Gobierno por bin cu un sistema manera tin na Merca, cu den e periodo di compras di articulonan pa scol, ta exonera e comercio di e impuestonan riba locual ta material escolar incluyendo paña, zapato, etc., y articulonan di boekhandel. Algun estado tin e asina yama “Tax Free Weekend” unda tur material pa scol, manera buki, pen, tas, schrift, ta cu 0% di belasting.
Na Merca tin cierto exigencianan si, pa controla y constata cu ta hende local ta haci uso di e beneficio aki y no personanan biba na otro pais (turistanan).
Esaki lo por alivia e mayor su gastonan, pasobra mester inclui e pago di inscripcion di mucha na scol cu sigur no ta barata, como tambe e carchi di bus escolar pa esnan cu ta viaha cu Arubus, cu tambe mester paga den e temporada aki.
Ohala gobierno por contempla e posibilidad aki, y mas den e ultimo temponan aki cu hopi famia a bay atras den nan poder di compra, danki na e crisis economico-financiero cu nos pais ta pasando den dje, y cu tin efecto riba e consumidor y e comerciante y cu practicamente, hopi consumidor ta considera cu no tin control.
