Minister Bikker:
ORANJESTAD(AAN): Durante un conferencia di prensa di Gobierno Diahuebs, Minister di Husticia Andin Bikker a papia riba e situacion di Venezuela.
“E situacion na Venezuela ta keda demanda hopi atencion di Gobierno”.
“Manera boso por wak, no solamente na Aruba, sino na Corsow, Colombia y tur e otro paisnan cu tin frontera cu Venezuela of ta cerca di e pais, ta haya nan cu diferente reto y desde cu nos a drenta den Gobierno nos tambe tin e retonan aki”.
“Nos a tuma pasonan concreto y nos a cambia diferente ley, entre otro e asina yama ‘toelatingsbesluit, caminda cu nos a introduci un sistema moderno pa loke ta trata e aplicacionnan di asilo”.
“Nos a haya un fluho enorme sin precedente di aplicacion y ora cu nos a bay wak, no tabata tin leynan specifico pa atende cu esaki”.
“Al contrario, nos a hereda un ley introduci na 2009 cu practicamente tabata invita personanan pa bin hasi uso indebido di e proceso di asilo, caminda cu nan tabata yega tin biaha den gran cantidad via di vuelonan regular y pidi asilo”.
Esaki segun Bikker, kende a indica cu ora cu a bay hasi un analisis, a ripara cu 97% di e personanan aki no ta bin na remarke, pues nan no ta refugiadonan normal, sino refugiadonan economico.
“Nan ta busca asilo pa un mihor porvenir, pero segun e tratado di refugiado esey no ta cay bao di e motibonan pa duna asilo politico”, segun e mandatario.
“Nos obligacion segun e tratado ta pa preveni cu si un persona wordo manda bek su integridad, su salud y su bida por ta na peliger”.
“Mayoria no ta cay bao di e categoria aki y nos pais no tin espacio pa esnan cu ta bin busca un mihor porvenir”, segun Bikker.
