Home Policial Pa mehora servicio di KPA e mester di e sosten di tur...

Pa mehora servicio di KPA e mester di e sosten di tur polis, staf, Bureau di Minister y pueblo!

253
0
SHARE
- Advertisement -

Alto Comisario Andrew Hoo:

ORANJESTAD (AAN) – Alto Comisario di Polis sr. Andrew Hoo, a declara den entrevista cu DIARIO, cu semper den tur organizacion, tin un grupo cu ta di acuerdo cu e maneho cu ta wordo hiba door di e hefatura, y otro cu no ta contento y tambe tin un grupo cu ta keda neutral.

Alto Comisario Hoo ta haya si, cu e grupo cu no ta contento mester wak nan mes kico nan ta aporta pa mehora e organizacion. Nan ta culpa e leiding cada bez pero e ta puntra kico nan mes ta haciendo pa mehora e situacion: Keha? Punta dede?

Esaki no ta e forma pa resolve problema, ni sacando informacion interno hibe pafo, ni papia cosnan cu no ta corecto. Cu esaki nan no ta yuda pero ta trece mas incertidumbre den e organizacion.

Segun Alto Comisario esnan cu no ta contento ta pasobra kizas nan a haci algo fout y pesey nan no ta di acuerdo cu cierto maneho.

Sr. Hoo a reitera cu su porta ta habri pa bin papia, vocifera e situacion y yega na un areglo. E ta compronde tur polis pasobra e tambe ta bin for di e base y sa hopi bon kico ta e trabao di polis di caya. Locual e ta desea ta pa esnan cu no ta contento bin cerca dje papia na lugar di bay pafo lanta stof.

Sr. Hoo a subraya cu e servicio na pueblo mester wordo duna semper, den bon y den malo. Comunidad no mester wordo perhudica debi na loke por ta pasando internamente. E trabao di e dirigentenan di e organizacion ta precisamente pa Cuerpo cana bon y brinda e servicio y proteccion cu pueblo merece y ta e meta pa cual KPA tey.

Alto Comisario a señala cu den tur organizacion internamente por tin cosnan cu ta bay bon, pero tur mester señala kico mester haci pa mehora e organizacion. Pa trece cambio den KPA e no por haci esey su so, sr. Hoo ta señala.

“Mi tin un vision. Mi kier dirigi e Cuerpo unda e mester bay pero mi mester ayudo di mi staf, di mesun polis cu ta traha riba caya. Nos hunto mester hacie y duna mi e espacio pa mi por duna e vision aki y eherce esey cu ayudo di mi staf, tur otro polis y e ciudadanonan. Y hunto cu e sosten di e Bureau di Minister nos por yega na un mehoracion di e Cuerpo. Pero esaki ta tuma su tempo, no ta di awe pa mañan e ta drecha”, Alto Comisario sr. Andrew Hoo a señala.

 

- Advertisement -

DUNA COMENTARIO

Please enter your comment!
Please enter your name here