Home Policial Polis a descubri ladron coriendo cu auto y yen cacho horta aden

Polis a descubri ladron coriendo cu auto y yen cacho horta aden

829
0
SHARE
- Advertisement -

ORANJESTAD (AAN): Pueblo a cuminza fada di diferente caso, unda cachonan di raza ta wordo horta hasta den dia cla.  Hendenan cu no tin security camera na cas, ta bira victima cu nan ta yega cas y descubri cu nan cacho no tey.

Pero Diadomingo atardi, Polis a haya un bon tip y a dicidi na traha rapidamente riba dje.  Esaki den bon coordinacion entre Central di Polis como tambe Wachtcommandant di Polis di San Nicolas.

E atardi ey atrobe un cacho di raza a wordo horta, pero e biaha aki tin testigo cu a mira tur cos.  Mesora yamadanan a drenta na Polis, y esey a inclui descripcion di e persona, y tambe modelo di e vehiculo cu ladron a usa pa bay cu e cacho.

Esey a pone cu mesora Polisnan riba caya a cuminza busca rond pa mira si nan ta haya un Toyota Levin color blanco, cu un oversized spoiler preto riba e baul.

Polisnan a mobiliza den areanan unda nan ta sospecha cu e persona por ta moviendo, y dicho hecho!  Den Sabana Basora, diripiente un agente a mira e vehiculo ta moviendo cu dos hende aden.  Inmediatamente a pone e otro Polis na altura, a raporta na Central di Polis, y a cuminza move mesora su tras.

Eybanda mes Polis a logra blokea e chauffeur y el a haye obliga na stop.  For di pafo caba, Polis por a tende cantidad di cacho ta blaf den e vehiculo.

E chauffeur a resulta di ta un conocido di Husticia, esta J. Croes.  El a wordo aresta, y e otro persona tambe.  E identificacion di e otro persona no a bira conoci.

Y e cachonan cu a wordo horta, enberdad tabata den e auto.

Polis a hiba e persona pa Warda di Polis, hunto cu e auto.  A check personal di K9 pa bin yuda atende e cachonan.  Como cu e biaha aki denuncia a wordo entrega, esey nifica cu e detenido tin di bay wordo procesa y ta keda encarcela.

 

- Advertisement -

DUNA COMENTARIO

Please enter your comment!
Please enter your name here