Raad van Advies a rechasa proposicion pa baha BBO
*Citgo tabata cortina di huma pa sconde crisis na 2014
*Raad van Advies a bisa cu Mike no a studia resultado
ORANJESTAD(AAN)– Manera tur informacion ta indica, na e momentonan aki Aruba mester resolve su problemanan financiero. Informacionnan cu DIARIO a ricibi di fuentenan directamente conecta na Mike Eman, el a duna inicio na su campaña pa eleccion 2021.
Pa por alcansa su proposito di bolbe na gobernacion, Mike Eman kier acusa e gobierno actual di a ocasiona e crisis cu Aruba ta aden actualmente.
DIARIO cu a informa Aruba semper a base di informacion concreto, hunto cu informantenan a analisa rapportnan oficial for di momento cu Mike Eman a subi como Ministro Presidente na 2009 haciendo uzo di introduccion di BBO.
Awe DIARIO ta bini cu prueba pa loke semper DIARIO a mustra. Mike Eman tabata sa cu e no por a baha BBO sin causa problema financiero serio pa Aruba.
E no a haci ningun estudio ni investigacion debido pa e presenta e proposicion di baha BBO na Pueblo.
Na momento cu el a asumi poder, el a entrega e ley cu Raad van Advies a rechasa pa motibonan cu awe DIARIO ta mustra pueblo na forma pa pueblo comprende.
No tabata tin estudio pero manera Raad van Advies a remarca, e no por a bay di acuerdo cu e proposicion di Mike Eman pasobra directamente e tabata hinca Aruba den un debe for di 2010.
Awe cu grafico DIARIO ta demostra con pa introduci BBO na 2010, Mike Eman a laga su gobierno haci un prestamo di casa 100 Miyon Florin.
Awe cu grafico DIARIO ta demostra con un calculacion di Supervision Hulandes na 2014 a papia di un debe enorme cu Mike Eman a crea na 2014 ora el a hinca Aruba den crisis y a bay busca Citgo pa sconde e situacion serio cu Aruba tabata aden.
DIARIO ta produci prueba di e problemanan cu Mike Eman a crea prome cu el a yega na un acuerdo cu Nicolas Maduro pa hinca Aruba den e aventura di Citgo, cu e tabata sa cu lo destrui e pais ya cu Citgo tabata hipoteca y Venezuela den problema serio ora a firma e contracto di Citgo.
DIARIO lo sigui informa Aruba cu tur informacion pa asina Aruba den trankilidad por resolve e situacion financiero serio cu Aruba ta aden pa motibo di e crisis cu Mike Eman a origina na 2009 manera prueba ta demostra.
Tur instancia oficial, incluso Algemene Rekenkamer Aruba, cu ta encarga oficialmente cu cifranan di Aruba, a relata e forma cu Gabinete Eman no a tene na reglanan di bon gobernacion pa maneha Aruba.
