Home Enseñanza Ramon Todd Dandaré no ta lubida su klas 4B na Colegio cu...

Ramon Todd Dandaré no ta lubida su klas 4B na Colegio cu studiantenan cu pensamento critico

149
0
SHARE
- Advertisement -

Den su prome aña di docente cu e ta considera esun miho:

ORANJESTAD (AAN) – Manera por a lesa den dos articulo anterior, DIARIO a trece dilanti den un recorido corto, parti di e trayectoria largo di e docentenan drs. Joyce Pereira y drs. Ramon Todd Dandaré, cu ta cumpliendo 50 aña como docente di Idioma.

Ramon Todd-Dandaré a sigui conta cu el a caba su estudio di Spaño basta lihe. El a cuminza na October aña 1965 y caba su MO-B na Februari 1969.

El a relata cu ora el a yega Aruba bek, el a bin topa su docente di Spaño tempo cu e tabata studiante na Colegio, Meneer Sjef Tjon-En-Fa, cu ta e persona cu a cuminza guie na Colegio, y cu ora nan a bira colega e tabata tin te examen klas, mientras cu Todd Dandaré a haya di eerste te 4de Klas.  E tempo ey tabata tin te 5de Klas, kiermen no tabata tin te 6de klas manera awo.

El a comenta cu nunca e lo por lubida cu su prome aña como docente, tabata esun mihor pa semper den su bida  den enseñanza.

E ta corda di su klas 4 B, un klas di HBS e tempo ey, cu tabata esun specializa pa Enseñanzanan BETA (matematica, fisica, quimica, biologia).

Esaki tabata den e añanan 60 cu tabata un periodo di hopi turbulencia, revolucion di tur sorto: cultural, economico, politico (manera e revolucion Cubano); e paisnan Africano a cuminza lucha pa nan independencia. Y a surgi e gran pensador naci na Martinique Frants Fanon, ken a pensa pa tur hende color scur; tambe Paulo Freire na Brasil. Nan tabata figuranan cu a genera hopi idea den e añanan 60.

Den e klas 4 B na studiantenan cu a bira profesionalnan reconoci, manera Fabio Moreta, Jaime Falconi, Richard Goeloe (den feliz memoria), Victor Loeftook, entre otronan. Nan tabata studiantenan hopi inteligente y cu un sentido critico.

“Anto den mi lesnan di Spaño, mi tabata discuti cu nan tocante politica den e ambiente di e momento ey. Sin lubida cu dia 15 di Augustus, cu nos a cuminza duna les, tabata tin na e Estado di New York e Festival di Woodstock. Un festival pa libertad, amor y paz, pasobra nan tabata contra e guera di Vietnam. Y esaki ta temanan cu mi tabata discuti cu e studiantenan aki den mi lesnan di Spaño. E tabata e cuminzamento di duna les pa mi, pero tambe un encuentro unda mi a mira cu nos tin hende cu por pensa critico”, Ramon Todd-Dandaré a expresa.

Despues el a ripara cu poco, poco den transcurso di tempo  e sentido critico a bay perdi y na dado momento e no tabata sinti su mes feliz cu como docente el a haci su best pa crea un pensamento critico den e studiantenan, pero nan no tabata tine. Na 1973, Ramon Todd Dandaré a kita for di Colegio.

Den e tempo aki su pensamento tabata riba Papiamento, y el a dicidi di bay specializa den Linguistica pa e siña conoce y studia Papiamento miho. El a haci un estudio di Master den Linguistica, na Universidad del Valle na Cali, Colombia. Ora el a bolbe Aruba na 1975, el a bolbe haya trabao na Colegio.

E tempo ey tambe Colegio a amplia cu HAVO y VWO, y diripiente e scol a bira demasiado grandi, pero Ramon a keda cu e pensamento di e falta di un sentido critico.

El a keda traha na Colegio te aña 1977 y, mientras tanto, el a haya nombramento na Departamento di Enseñanza como Linguista, y el a set up e Instituto Linguistico cu tabata un Instituto di Antiyas. Na 1986, ora Aruba a sali for di e Constelacion Antiyano y haya su Status Apart e Instituto a bira INDILA. Despues Frans Martinus a bin aden y tambe Pedro Velasquez, entre otro.

- Advertisement -

DUNA COMENTARIO

Please enter your comment!
Please enter your name here