Home Hudicial Reclassering a mustra claramente cu e rumannan Ramirez no tin respet pa...

Reclassering a mustra claramente cu e rumannan Ramirez no tin respet pa comunidad

1328
0
SHARE
- Advertisement -

ORANJESTAD (AAN): E dos hobennan cu a huy, esta Jorge Antonio Ramirez di 20 aña, y Joander Anthony Alexander Ramirez di 19 aña ta dos persona hopi peligroso, cu ta sinti nan mes como ‘gangster’, y ta hang cu hendenan cu pensamento similar, y hunto ta comete fechoria riba caya.

Hasta a sali na cla cu Reclassering a purba di yuda tanto Jorge y tambe Joander,  pero a constata cu nan no tin respet pa comunidad y no kier yudanza.  Asina ‘mala mucha’ y den mal caminda nan ta.  Hobennan realmente ‘perdi’.

Na luna di Mei cu a pasa, ambos a wordo condena pa atraco pisa cometi.

   SERIE DI ASALTO ARMA:

Den Corte, en total ta 7 caso di asalto arma Fiscal a presenta y tambe dos caso serio caminda den un caso ta papia di hincamento di un preso den KIA y e otro caso ta di cu a secuestra dos mucha homber y bati nan formal. E acusacionnan cu Fiscal a presenta ta:

– Riba 19 September 2018, nan hunto cu otronan a haci e asalto arma riba Well Done II Snacktruck na Plaza Las Americas. Nan a usa arma di candela y cuchiu pa menaza y a bay cu placa.

– Riba 24 September 2018, e mesun grupo a haci asalto arma riba The Terrace na Ritz Savaneta. A usa arma di candela y cuchiu.

– Riba 27 September 2018, e grupo a haci asalto arma riba Shap Convenience Store na Shiribana caminda a menaza cu arma y cuchiu. Nan a bay cu placa y cantidad di caha di cigaria. E sigarianan ta worde balora na mas cu 3.500 Florin.

– Dia 1 October 2018, intento di asalto riba Tur Dia Market na Tanki Leendert. E mesun grupo a bay y aki e Chines homber a manda un boter riba nan y un di e asaltantenan cu tabata arma, a los tiro den negoshi. Danki Dios ningun hende a resulta herida. E asaltantenan a core bay sin logra horta nada.

– Dia 1 October 2018, despues di e fracaso na Tur Dia Market, nan a haci asalto na Rowigini’s.  Aki a pone tur hende abao, y a horta nan cartera y mas.

– Dia 1 October 2018 e grupo a caba di comete e fechoria na Tur Dia Market y tambe na Rowigini’s, y a bay haci asalto arma na Rey Hing Bar & Restaurant, caminda cu a bay cu un cantidad di placa for di clientenan cu tabata den e bar.

– Dia 18 Augustus, nan a bay San Nicolas caminda a secuestra dos mucha y na altura di community pool, nan a bati e dos muchanan aki na forma mahos, pa exigi di nan pa bisa unda e arma di Ramirez, cu el a perde ta. Nan a bisa cu nan no sa.

– Dia 23 Juni 2018, Ramirez hunto cu un Venezolano a haci asalto na Citgo Tanki Leendert caminda a obliga e cahera habri e caha y bay cu placa. Aki e asaltantenan tabata arma cu schroefdraai y cuchiu.

   FISCAL A TRATA NAN DURO:

Den su requisitorio, Fiscal a mustra con ora Atraco Team a gara e rumannan Ramirez aki, casonan di asalto arma a stop pa un temporada na Aruba.

Fiscal a cuestiona cu Joander Ramirez tabatin un actitud den Corte, e ta blo bisa cu e “no a haci nada” y tabata purba di influencia e otronan pa cambia nan declaracion. Fiscal a tene cuenta cu e shock cu e casonan aki a causa den comunidad.

Pesey Fiscal a haya cu mester exigi castigo halto pasobra loke e rumannan aki a haci ta pone nos turismo na peliger. Aruba ta conoci como un pais sigur pero loke e grupo aki a haci ta mustra net e contrario esta cu Aruba no ta sigur.

Pa Joander Ramirez, Fiscal a mustra cu e hoben a participa den 5 asalto di cual 2 asalto e tabata menor di edad. E tambe a secuestra dos mucha y a maltrata nan. Fiscal a exigi 10 aña di prison.

Huez a duna Joander Ramirez castigo di 9 aña di prison.  Huez a duna Jorge Ramirez castigo di 11 aña di prison.

Riba e potret di aña pasa October, por mira autoridad ta hayando declaracion di e propietarionan di Tur Dia Market na Tanki Leendert.

- Advertisement -

DUNA COMENTARIO

Please enter your comment!
Please enter your name here