Home General Riba Diamars ainda tin algun hende cu kier paga cu papel bieu...

Riba Diamars ainda tin algun hende cu kier paga cu papel bieu di Florin

43
0
SHARE
- Advertisement -

ORANJESTAD (AAN): Aunke ya caba riba Dialuna a sali publica den DIARIO e informacion cu no por usa mas papelnan bieu di Florin pa transaccion comercial.  Na banco so bo por entrega nan por lo pronto.

Pero toch a bin compronde, cu keto bay tin hopi hende cu ta cumprando articulo y kier paga cu e papel bieu di placa.  Un comerciante a splica na DIARIO, cu ainda riba Diamars e ta haya hende cu kier paga cu e papelnan aki.  Siendo cu den DIARIO y hopi otro medio mas a sali informacion desde Juni caba, cu Diadomingo 11 di Augustus tabata e ultimo dia.

Pues Dialuna 12 di Augustus 2019, oficialmente e papelnan di Florin bieu a sali for di circulacion.

Desde 4 di Juni 2019 cu e papelnan nobo a sali riba mercado, Banco Central di Aruba a duna OK pa tanto e papelnan bieu (serie 2003) como e papelnan nobo por co-circula hunto pa dos luna largo.  Pues por a haci uso di ambos.

E ultimo fecha cu ta acepta co-circulacion tabata Diadomingo 11 di Augustus 2019.

Riba Dialuna cu a pasa, e serie 2003 di papelnan di Florin ta sali for di circulacion, y no por usa nan mas pa haci pago of ricibi cambio.

Pues e siman aki en adelante si bo cumpra algo, y e cashier kier dunabo buelta den e papel bieu di Florin, abo como cliente tin di rechasa esey.  Pasobra ta abo lo bay keda pega cu e placa ey, y bo por cambie ainda na un Banco comercial.  Bo por haci esey na banco te 4 December 2019.

Sinembargo entrante 5 December 2019 bo por cambia e papelnan bieu aki solamente na Banco Central di Aruba.

E papelnan nobo di Florin pa Aruba, tabata un proyecto cu a dura 7 aña pa duna fruto.  E serie nobo di papelnan aki yama “Bida na Aruba”, den cual ta figura nos flora, fauna, herencia cultural, monumentonan y lugarnan prominente na Aruba.

E papelnan bieu aworaki ta solamente Banco lo tuma nan.  Ningun otro lugar.

 

- Advertisement -

DUNA COMENTARIO

Please enter your comment!
Please enter your name here