Home Comercio Riba un caha di galiña gobierno ta gana mas cu e comerciante...

Riba un caha di galiña gobierno ta gana mas cu e comerciante como ‘groothandle’

1473
0
SHARE
- Advertisement -

Comerciante Francis Saladin ta mire como abuso:

ORANJESTAD (AAN) — Francis Saladin, Director di Frasa Trading, den conferencia di prensa yama pa e Comerciantenan Uni Aruba, cu a tuma lugar den KvK, a expresa cu e ta scucha consumidornan bisa cu e comestiblenan a bira hopi caro.

Sr. Saladin a splica cu esaki tin diferente motibo y un di nan ta cu nos pais ta importa casi 100% di e cuminda, y esaki caba ta un razon cu e cuminda ta caro.

E cuminda mester wordo treci via barco den container y tin biaha via avion, y e fletenan pa Aruba ta masha caro mes, mirando cu Aruba ta un Isla cu no ta exporta.

Pues, basicamente e containernan ora nan yega Aruba nan ta bay bek bashi, y esey ta haci cu e ta hopi mas costoso cu un pais cu si ta exporta y por percura pa saca un container bek cu producto den dje, y pa e companianan di navegacion ta hopi mas interesante e ora ey, compara cu Aruba.

Otro aspecto cu ta haci Aruba caro ta cu nos Isla ta chikito. Na nivel internacional nos pais no tin e poder of e posicion di negociacion pa haya prijs faborable, manera un pais grandi cu ta cumpra miles di container di un producto, compara cu nos pais.

Saladin a expresa cu hopi biaha e ta bisa cu nos pais mester ta contento cu nan ta supplier nos mercado, pasobra internacionalmente Aruba ta score masha chikito mes.

E ta compara esaki cu un tienda grandi unda e consumidor por cumpra mas y haya mihor prijs  cu den un tienda chikito cu ta cumpra menos y tin un prijs di producto mas caro. Aruba ta e tienda chikito ey.

El a señala cu mas cu claro, na momento cu gobierno na 2007 a introduci e BBO cu tabata 3%, esey ya caba tabata un extra gasto cu mester a wordo poni y cobra na e consumidor. Di hecho ta, sr. Saladin a sigui splica, cu gobierno a introduci un sistema cumulativo y esaki ta un desastre total. Ora bo coi invoerrechten e tempo ey BBO di 3% y hacie cumulativo, e tabata tin un impacto cu for di e tempo ey e consumidor a keha caba cu e productonan a bira caro y cu prijs a subi.

El a bisa cu e realidad ta cu e foyeto di servicio di impuesto mes. cu ta data di 2006 ta splica kico BBO ta nifica pa e consumidor. E ta bisa claramente cu e consumidor ta paga indirectamente, y claro esaki ta crea automaticamente, un impacto riba e prijs di e producto y e consumidor ta paga pe.

Tambe den e foyeto ta wordo remarca cu no necesariamente mester tin e BBO inclui den e prijs, ya cu e comerciante por dicidi pa tuma e BBO pa su cuenta.

Saladin ta subraya cu no ta bisa cu mester tume, sino cu e por tume. E no ta cuadra cu loke e minister di finanzas a bisa cu BBO, BAZV y BAVP ta un impuesto pa comerciante, pasobra e no ta! No tur comerciante por absorbe e impuestonan aki, tin cu por, tin cu no por.

Tambe den e foyeto ta duna ehemplonan con e BBO lo afecta e productonan comestible. Pues e ta ilustra cu prijs ta subi. Y ken ta paga pe? E consumidor, no e comerciante.

Cu 3% a haci prijs di producto caro y aña pasa a implementa BAZV y BAVP, cu a subie te 6% e ta hacie hopi mas caro, ya cu gobierno ta cobra invoerrechten, ta cobra 6% na nivel di groothandle y e ta bolbe cobra 6% na nivel di retail, supermercado den e caso aki, y esaki ta conta tambe pa restaurantnan cu tambe ta paga ‘groothandle’ 6% y di eynan e tin cu cobra e consumidor, cu ta e cliente cu ta bishita e restaurant, e 6%.

Esaki ta causa un inflacion barbaro y cu razon  tur hende riba caya ta keha di e prijs di productonan riba e mercado di consumo. Sr. Saladin a acentua cu gobierno, tin biaha, ta gana mas cu e comerciantenan como ‘groothandle’. Riba un caha di galiña gobierno ta gana mas cu e comerciante como ‘groothandle’. Pues ta mas cu claro cu e consumidor ta keha pasobra ta un abuso completo na momento cu tin tres schakel cu gobierno ta cobra riba dje, na momento cu e supplier ta bende y na momento cu e supermercado ta bende.

Mirando esaki sr. Saladin ta haya cu ta bon pa gobierno elimina e aspecto cumulativo y asina aki reduci y yuda alivia un poco e consumidor pa cu e prijs di productonan.

- Advertisement -

DUNA COMENTARIO

Please enter your comment!
Please enter your name here