Andres Hernandez, di SNBA
ORANJESTAD (AAN): E prome cumbre di negoshi di San Nicolas a tuma lugar diaranzon. Durante di e cumbre aki tabata tin presencia di Gobernador Alfonso Boekhoudt, Prome Minister Evelyn Wever Croes, coleganan minister, parlamentarionan, representantenan di San Nicolas Business Association, comerciantenan, inversionistanan, stakeholders, entre otro.
E ‘summit’ aki tabata tin basta spectativa ariba dje pa e hecho cu e intencion tabata pa scucha kico ta e plannan pa San Nicolas den e proximo 6 lunanan.
E comerciantenan na San Nicolas ta gritando pa auxilio. Kier sa kico tin den plan y kico por haci pa yuda rescata comercio pariba di brug.
E dia aki a sinta hunto pa scucha kico ta e preocupacionnan y cual ta e propuestanan cu a bin ariba mesa pa asina haci algo lihe pa San Nicolas.
Tin hopi proyecto ariba liña, segun Andres Hernandez, di San Nicolas Business Association y si 10% di loke a wordo treci dilanti sosode, den e proximo 6 lunanan lo tin un San Nicolas nobo.
E renobacion di San Nicolas a cuminza ora cu a pensa pa haci di e distrito aki un “cultural heritage”, un ciudad cultural. Aworaki tin e proyecto pa traha e hotel nobo cual ta spera keda cla pa 2021.
Hernandez ta masha contento di por a logra organiza un tremendo ‘First San Nicolas Business Summit’. Ainda te na ultimo ora tabata tin yamadanan di otro inversionistanan di pariba di brug cu tabata kier haci aparicion.
Pero a bisa nan cu lo cuminza traha ariba un di dos cumbre unda lo por laga e miembronan participa y tur e otro inversionistanan cu no por a participa den e evento diaranzon.
