Minister Glenbert Croes:
ORANJESTAD (AAN) – Den e ronda di pregunta, durante e conferencia di prensa di gobierno, den e ocasion aki cu Minister di Labor y Asunto Social sr. Glenbert Croes, a bin dilanti e hecho cu CAft ta sigui cuestiona e fondonan di Social Crisis Plan.
E mandatario a expresa cu e pregunta ey ta señala un di e retonan mas grandi cu gobierno ta bay tin. E por pensa cu CAft kizas kier mara su man, pero no ta minister Glenbert Croes su man nan ta mara cu e medida cu nan kier tuma, contra e Social Crisis Plan.
E medida cu CAft kier tuma ta mara man di e Social Crisis Plan, e causa social, e maneho social, e programa y e emergencia social cu cual e Social Crisis Plan ta atendiendo den un envergadura nacional. CAft su intencionnan lo mata e Social Crisis Plan.
“Esey ta mi opinion como minister encarga cu e Social Crisis Plan. Pero ora bo critica CAft tin momento cu ta bon pa bo pone bo mes den nan zapato. Mi kier ta honesto den e discusion aki. CAft a wordo engaña, malusa y manipula door di e gobierno anterior. Apesar di CAft nos debe nacional, gastonan publico financiero di gobierno a bay na extremonan totalmente inaceptable. Kiermen, mi por compronde cu CAft posiblemente ta dudoso cu e tin un gobierno nobo, cu e no conoce, y kizas nan no tin e nivel di confianza ainda cu nos. Pero mi ta bisa pa no huzga nos pa nos palabranan, huzga nos pa nos hechonan”, e dignatario a expresa.
Minister Croes a señala cu gobieno ta bahando gasto y tin desafionan grandi. Gobierno a dicidi di pone e ser humano, e causanan y emergencianan social central, y a crea un Social Crisis Plan Y CAft kizas ta preocupa cu e proceso di seleccion di personal, cu nan por kere cu patronahe politico por tuma lugar, loke absolutamente no ta e caso.
Of kizas nan ta pensa cu gobierno mester ta atendiendo e problemanan financiero di nos pais, y wanta cu atende e problemanan social di nos pueblo. “E ora ey, eynan nos tin un diferencia di opinion fundamental” e mandatario a menciona.
Minister Glenbert Croes a acentua cu gobierno a dicidi pa atende cu e problema financiero di e pais y alavez cu e problemanan social atravez di e fondo di Crisis Plan Social, pasobra si no atende cune e crisis por bira un caos y yega na e extremo di bira un inestabilidad social.
“Si CAft ta haya su gana e Crisis Plan Social lo stop di existi y nos meta ta pa haci un apelacion riba e sano razonamento di e profesionalnan di CAft pa nan compronde cu Gabinete Wever-Croes a scoge pa atende cu e problemanan financiero di un forma serio, y nos a dicidi pa atende e problemanan social di un forma serio” el a señala.
