Andres Hernandez a splica:
ORANJESTAD (AAN) – Den entrevista cu DIARIO, señor Andres Hernandez, miembro di Asociacion di Comercio di San Nicolas (SNBA), a duna di conoce cu SNBA tabata tin un reunion sumamente positivo, cu Minister di Economia y Finanzas mr. Xiomara Ruiz – Maduro.
Hernandez a menciona cu e reunion tabata tin diferente aspecto. Un di nan tabata gradici cu SNBA a haya sr. Eric Nassy, apunta pa yuda e asociacion den e epoca cu e ta bay biba aworaki.
Hernandez a bisa cu tabata interesante cu nan a trece dilanti e tema di e reforma fiscal y elabora tocante: “con nan ta bay haci esaki awo?” Pasobra nan tur ta contento cu e desaroyo di un hotel y e cambionan cu ta bin y ta bay tin mester di un forma pa atrae e comerciantenan local, inversionistanan local y tambe di afo.
E mandatario a bay di acuerdo y bisa cu nan ta studiando, pa otro aña, pa San Nicolas haya un beneficio fiscal temporario pa inversionistanan cu lo bin pariba di brug.
Andres Hernandez a señala cu no mester lubida cu tin un construccion andando, y tin un grupo grandi di trahador di tur nivel cu ta bay maneha e hotel, y no por warda te e hotel keda cla pa bin cu un beneficio den e reforma fiscal pa nan trece hende pariba.
E idea ta cu pa otro aña lo tin algun clarificacion, y manera e minister a splica SNBA poco poco nan por implementa e beneficio fiscal, pa e tempo cu lo stipula.
Manera ta conoci e proceso pa habri negoshi nobo na Aruba ta tarda como 5 luna, y pesey SNBA a tuma Eric Nassy cu ta encargando su mes caba, pa acelera e proceso.
Hernandez ta kere cu pronto nan lo ta un poco mas organiza di manera cu e permisonan pa lanta negoshi por cana un tiki mas lihe.
Pronto SNBA lo tin un summit den cual minister di Economia y Finanzas lo habri e dia ey, y trece su punto di bista. E summit aki ta dirigi cu e interesadonan mester presenta nan proyecto, indica con ta bay yega nan dje, of cu e solucion economico-social cla caba. E proyecto mester cuminza den e siguiente seis lunanan a partir di e summit.
Minister Ruiz-Maduro a ricibi su invitacion y el a bisa cu su ministerio lo tey presente y lo bin dilanti cu un proyecto. E summit mes ta den e etapa di entrevistanan. SNBA ta entregando invitacion a base di entrevista scuchando y mirando kico nan tin mester pa sosode e dia ey. Andres Hernandez a expresa cu esey lo ta e “Dia di e Berdad” unda cu ken cu tin un proyecto pa San Nicolas lo mester bin dilanti cune, y e asociacion lo follow up riba dje pa ta sigur cu mayoria di e porcentahe lo por wordo realiza.
