Home General Ta hopi importante pa entrega e formulario di DAS prome cu 30...

Ta hopi importante pa entrega e formulario di DAS prome cu 30 di Augustus

22
0
SHARE
- Advertisement -

ORANJESTAD(AAN): Diamars mainta a tuma lugar un conferencia di prensa na Departamento di Asuntonan Social (DAS), unda cu Jesseline Soto Garcia Kelly di DAS a duna un splicacion riba e ayudo financiero extra cu Gobierno ta bay duna tur persona den bijstand den luna di September.

“E ayudo financiero aki ta consisti di dos parti”.

“E prome ta e asina yama ‘school uitkering’ y e di dos ta e ‘ouderlijke bijdrage’”.

Esaki segun Kelly, kende a indica cu e ayudo aki ta pa tur persona den bijstand, sea bijstand normal of e bijstand pa personanan cu limitacion.

Pa loke ta e school uitkering, e ta pa personanan di entre 4 y 24 aña cu ta bayendo school durante dia.

E ayudo ta wordo duna 1 biaha pa aña, esta den luna di September.

Kelly a splica cu e school uitkering ta consisti di un suma di 220 florin pa cada persona, pero cu un maximo di 800 florin pa famia.

“E school uitkering ta wordo paga rond di 7 di September y e ta pa yuda e famia pa cubri e gastonan di un aña escolar nobo”.

“Pa loke ta e ouderlijke bijdrage, esaki ta un ayudo pa e contribucion di e mayornan na cada school”.

“Esaki ta consisti di un suma di 120 florin pa cada persona”.

Esaki segun e representante di DAS, kende a sigui bisa cu akinan no tin un maximo, pero si mester tene cuenta cu e hecho cu si e contribucion di e mayor na school ta mas halto cu 120 florin, cada mayor tin cu paga e diferencia ey.

“E suma aki di 120 florin no ta wordo duna directamente den e pago di September, pero e ta pasa directamente na e school, pues e persona den bijstand no ta bay ricibi e placa aki”, segun Kelly, kende a splica tambe kico ta e rekisitonan.

El a indica cu entrante Diahuebs awo dia 15 di Augustus, cu ta e prome dia oficial di school, bo mester busca e formulario di DAS na bo school, bo mester yene completamente y bon y bo mester entrega esaki prome cu Diabierna 30 di Augustus na DAS na Playa of te cu 23 di Augustus na DAS San Nicolas.

Ora cu bo bay entrega tur cos, mester bay cu bo carnet di bijstand.

“Ta hopi importante pa cumpli cu e deadline di 30 di Augustus, pasobra si bo no cumpli cu esaki bo bijstand pa luna di September ta wordo blokea”.

“E dialuna di blokeo mas grandi di DAS tur aña ta e Dialuna di blokeo despues di e school y ouderlijke bijdrage”.

“Evita cualkier inconveniencia y cumpli cu e deadline, pues no warda te na ultimo momento”, segun Kelly, kende a enfatiza cu si bo no cumpli cu e deadline bo ta perde e derecho aki.

Pa esnan cu no trece e schoolverklaring, nan no ta bay haya tampoco e 250 florin mensual di kindertoelage.

“Si bo trece despues di 30 di Augustus, e departamento di DAS ta bay adapta esaki, pero bo no ta haya placa bek cu poder retroactivo di e lunanan cu bo no a cumpli”, segun Kelly, kende a agrega cu si tin por ehempel mama of tata den famia cu ta hayando bijstand y nan yiunan no ta hayando bijstand pa un of otro motibo, toch nan mester entrega e formulario aki na Departamento di Asuntonan Social.

Esaki ta conta tambe pa personanan riba 24 aña cu ta bayendo IPA of Universidad di Aruba, pa demostra cu nan ta bayendo school.

- Advertisement -

DUNA COMENTARIO

Please enter your comment!
Please enter your name here